Shillong, K’Lyngkot 31
Ka kynhun ki stad wad jingtip jong ka Zoological Survey of India (ZSI), Kolkata dang shen ka la lap ïa kawei ka jait thapbawa (ba kynthih) na kper slasha jong ka Jylla.
Ïa kane ka jait thapbawa bathymmai ba la tip kum ka ‘Phintella Handersoni’ la lap na ka Anderson Tea Estate, kaba ha Umran Dairy, Ri-Bhoi bad la ai kyrteng ïa ka kum ka jingkynmaw burom ïa i Bah Handerson Syiemlieh (Bam Kwai ha Dwar U Blei), trai jong ka kper slasha.
Ki jait ‘Phintella’, ki dei ki jait thapbawa kiba biang bad ba rit ha ka jingheh ha ryngkat ki jingthoh rong bad snep pynitynnad baphyrnai. Kane ka jait thapbawa ka don ruh ïa ka khlieh kaba pyllun ne ha dur jong ka pylleng ha ryngkat ka jingat ha ki bynta jong ka met, katba ka kpoh jong ka, ka wan ha ka dur jong ka pylleng ne lam jrong nalor ki dak jingshai bad ba dum.
Ïa katei ka kynhun la lamkhmat da u Dr. Souvik Sen, ZSI, Kolkata. Dr. Sudhin P.P., ZSI, Kolkata bad Dr. John T.D. Caleb na Saveetha University, Chennai ruh ki la ïashim bynta lang ha kane ka jingwad jingtip. Ka jinglap ïa kane ka jait thapbawa bathymmai na ka Jylla la dep pynmih ruh ha ka ‘Zoosystematics and Evolution’ ba dang shen.
Ki khun ki kti bad khun ksiew jong i Bah Handerson Syiemlieh (Bam Kwai ha Dwar U Blei) ki la pynpaw ka jingsngewkmen halor kane bad pynpaw ruh ka jingsngewnguh ïa ka jingtrei jong ka kynhun ka ZSI hapoh ka jingïalam u Dr. Sen.
