Shillong, K’Lyngkot 31
Ka Hynñiewtrep Youth Council (HYC) ka la maham da kaba tyngeh ïa kino-kino ki jaka treikam ne ki jaka pule ba kim bit satia ban pynibor ïa ki trai ri trai muluk haba ki dawa bad ki wan ïakren da ka lynti kaba dei.
Kaba la pynlong ïa ka seng ban buh jingmaham da kumtei ka dei hadien ba ka la leit ban mih sha u Director ka North Eastern Indira Gandhi Regional Institute of Health and Medical Sciences (NEIGRIHMS) ha ka Sngi Balang ban dawa pynrung 80% na ka 100% ka bhah ïoh kam ïa ki samla riewlum ka jylla ha katei ka jaka ai jingsumar nalor kiwei pat ki mat jingdawa. Na ka liang utei u Director u la ong pynban ba katei ka seng ka la wan tang ban thaw jingkulmar hapoh katei ka jaka ai jingsumar bad kaba la pynlong pat ïa ka seng ba kan dap da ka jingbitar bad mih jyndat napoh ka kamra treikam jong utei u Director.
Haba kren sha ki lad pathai khubor, u Bah Roy Kupar Synrem u la ong ba kino-kino ki bar jylla kiba wan hapoh kane ka jylla bad hapoh ka bri u Hynñiewtrep ki dei ban burom ïa ki trai ri trai muluk. U la ong ruh ba tang namar ba ki dei ki longheh-longhaiñ ne ki Director kiba shong ha ka shuki ba ki lah ban kren ne leh katba ki mon.
“Ngi tieng ba lada ïa ngi ki nongïalam sengbhalang, u lah ban kren kumto bad ban wan da katei jingpynsngew ba ngi dei kiba kham rit bad ma u pat un kham heh, kumno un ïadei bad ki ‘riew paidbah kiba dei ki paradoh ki parasnam.
U Bah Synrem u la phah da ka khubor kaba shai sha ki khlieh jong ki shlem treikam bapher-bapher kiba don hapoh ka Bri u Hynñiewtrep ba ka seng kan nym shu sngap jar bad lada donkam ba ka seng kan pyni da ka bor, kam banse ban hap leh ïa kata.
U Bah Synrem u la ong ruh ba kane ka dei tang ka jingsdang bad ka seng ka la ong ruh ba utei u Director u dei ban wan panmap na ka seng hapoh katei ka phyllaw bad lada utei u Director ne kiwei-kiwei ki tnad treikam ne ki tnad jingpule kiba don hapoh ka jylla ki ïai mlien ban leh ïa kum kitei ki kam, ka seng kan hap ban leh da kaba tyngeh.
“Ki dei ban sngewthuh ba kane ka dei ka jaka ka jong ngi bad lada ha ka jaka jong ngi phi kheiñ beiñ ïangi, ngim lah shah bad lada ngim lah shah bad lada ki mih kino-kino ki jingklumar, ki dei ban shim ma ki ïa ka jingkitkhlieh”, la ong u Bah Synrem.
Shuh shuh u Bah Synrem u la ong ba nangne shakhmat, ka seng kan sa ïai buddien ïa ki ophis sorkar khnang ban pyntikna ba ki samla ka Bri u Hynñiewtrep kin ïoh ïa ka kam ka jam ha kitei ki jaka.
“Lada ngi lap ba kino-kino ki ophis sorkar kim bud ryntih bad kim ailad ïa ki briew jong ngi ban ïoh kam, ka seng kan ym shu sngap bad shong kli-kti”, la ong u Bah Synrem.
Ha kaba ïadei pat bad ka jingïakren na ka bynta ka rukom thungkam thungjam, u Bah Synrem u la ong ba ka seng kan sa pynbeit ha kawei ka sngi bad ha kawei ka tarik ban wan ïakynduh biang.
Kum ban shu kdew hangne, ka seng ka la pyrshah ha kaba ïadei bad ka jingpynlong jong katei ka jaka ai jingsumar ban thungkam thungjam ïa ki nos lyngba ka eksam NORCET kumba leh lem kiwei pat ki jaka ai jingsumar kiba don shabar jong ka jylla.
U Bah Roy u la ong ba ka jingthungkam nos lyngba ka eksam NORCET ka pynlong ïa ki samla ba kin ym ïohlad ban shah thungkam nos.
U Bah Roy u la ong ruh ba napdeng ki 100 tam ki post thylli, ki samla ka bri u Hynñiewtrep kiba ïoh ban rung ïa ka kam nos lyngba ka NORCET ki don tang kumba 16-17 ngut eiei bad lyngba kane ka pynishai kdar ba ka pynduh lad ïa ki samla namar ba ka NORCET ka dei ka eksam kaba eh haduh katta-katta bad kaba dang thymmai.
Shuh shuh ka seng ka la ong ba ka jingdawa jong ka seng ka long ba ym dei ban pynlong eksam lyngba ka NORCET bad lada ka kwah ban pynlong ruh, ka dei ban ailad ïa ki trai ri trai muluk ba kin don ka jingnang jintip ha kaba ïadei bad kitei ki eksam.
Ka seng ka la dawa ruh ba ym dei ban khot ïa ki Agency kiba nabar bad kiba trei hapoh kitei ki Agency ruh ki dei ban long ki trai ri trai muluk. Nangta ka la dawa ruh ba ïa ki kam hapoh ka Group-B bad Group-C, katei ka jaka ai jingsumar ka dei ban thungkam 80% na ka 100% ïa ki trai ri trai muluk.
Ka seng ka la dawa ruh ba ki nos kiba la don lypa hapoh katei ka jaka ai jingsumar bad kiba la trei da ki snem ki snem, katei ka jaka ai jingsumar ka dei ban thungkam pura noh shisyndon ïa ki.
