Shillong, K’Lyngkot 31
Ka Directorate of Educational Research and Training (DERT) jong ka sorkar jylla ha ka Sngi Balang ka la pynbna ïa ka ‘Result’ jong ka eksamin Meghalaya Teacher Eligibility Test (MTET), 2023 ha kaba na ki 26,954 ngut kiba la ïakhun, kiba ‘pass’ ki long tang 2,319 ngut.
Ïa kane ka eksamin MTET la pynlong ha ka 1 tarik Nohprah, 2023 ha ki 15 tylli ki Centre ha kylleng ka jylla. Kine ki 26,954 ngut kiba la ïakhun bad ki 2,319 ngut kiba la ‘pass’ ki dei kiba la kheiñ kyllum lang na ka eksamin MTET Lower Primary bad Upper Primary.
Ha kaba ïadei bad ka eksamin MTET (Lower Primary), ki la don haduh 15,524 ngut kiba la ïakhun, bad na kine, tang 1,259 ngut ki la ‘pass’, bad ka ‘pass percentage’ ka long tang 9.05 na ka 100.
Ha ka liang ka eksamin MTET (Upper Primary), ki la don haduh 11,430 ngut kiba la ïakhun, hynrei kiba la ‘pass’ ki long tang 1,060 ngut, bad ka ‘pass percentage’ ka la kot tang sha ka 9.64 na ka 100.
Ka eksamin MTET ka long ka bakongsan na ka bynta kito ki nongshong shnong kiba kwah ban long nonghikai ha ki skul sorkar.
Ïa kane ka eksamin la pynlong ha ki 15 tylli ki Centre ba kynthup ïa ka Amlarem, Ampati, Baghmara, Dadenggre, Jowai, Khliehriat, Mairang, Mawkyrwat, Nongpoh, Nongstoiñ, Sohra, Shillong, Resubelpara, Tura bad Williamnagar.
