Shillong, K’Lyngkot 31
U Bah Kitboklang Nongrem uba dei President ka National People Youth Front (NPYF) u la ong ba ka jingmih sha surok jong ka seng Voice of the People Party (VPP) kaba la ïalam da u Bah Ardent M Basaïawmoit, ka long tang ka buit kumno ban ïoh jingmyntoi saiñ pyrthei da kaba pynjaboh ïa ka jingmut jingpyrkhat jong ki samla.
U Bah Kitboklang u la kren ïa kane ha ka jingïalang jong ka NPP Umsning Block kaba la long ha ka Sngi Balang ha Lad Sharai. Une u nongïalam ka NPYF u la ong ha ki snem 2008 bad 2013, ki paidbah ki lah ban kynmaw ba u Bah Ardent ha ka por ba u dang long u MLA um ju mih satia ban ïakhih ne dawa ïa kata ka Reservation Policy ne kiwei kiwei ki mat.
U Bah Kitboklang u la ong, hynrei hadien ba u Bah Ardent u la thaw ïa ka seng VPP u la sdang ban mih sha surok ban pynlong ki jingïakhih da ka jingthmu ban pynjaboh ïa ka jingmut jingpyrkhat ki samla na ka bynta kumno ban myntoi ha ka saiñ pyrthei.
Shuh shuh une u nongïalam ka NPYF u la ong ba ki paidbah ki dei ban sngewthuh ba ka jinglait kam ha ka shi snem ka long tang kumba 2000 tylli hynrei ki samla kiba wad kam wad jam pat ki don palat ïa ka 60,000 ngut. Kumta kane ka jingpynkhih ïa ka Reservation Policy ka long tang kumno ban ïoh ban pynrung ïa ka jingsngew mynsiem ha ki samla ki bym tip ba ka kam sorkar kam lah ban pynbiang kam ïa baroh.
Ha kawei pat ka liang, u Bah Kitboklang u la pynkynmaw ba u Bah Ardent u la sdang ruh ïa ka ‘Clean Politic’ kaba ki shu leh mynleh tang ha ka por ilekshon ban myntoi bad jop ilekshon. Pynban ynda ki la jop kim kwah ban ïarap ïa ki paidbah da kaba ong ba kim don bai skul, ban ïarap ïa kiba shitom hynrei kum u para briew haba donkam shisha kiba duk ka dei ka kamram ban ïarap namar haba shakri ïa u para briew ka long kajuh kumba shakri ïa U Blei.
“Kum ki paidbah kim dei ban shah ïalam bakla kumba nga la shah ïalam bakla ha u snem 2002 ha ka por ba la thaw bad mih ka KHNAM, kaba la pynkhih ïa ka dohnud jong nga ban pynim ïa ka ri bad ka jaidbynriew, hynrei hadien bun snem nga lap ba nga shah ïalam bakla, shah pynjaboh ïa ka jingmut jingpyrkhat jong nga,” la bynrap shuh u Bah Kitboklang.
