Shillong, K’lyngkot:
Ka Seng Samla Shnong Mawlai Umshing Umjapung ka la pynlong ïa ka Winter Games 2024 na ka bynta ki nongshong shnong jong ka shnong Mawlai Umshing Umjapung naduh ka 22 tarik haduh ka 27 tarik, Kyllalyngkot, 2024 ha kaba la ïoh ban pynlong ïa ki jingïalehkai bapher bapher kiba kynthup naduh ka marathon, football, maw point, carrom board bad kiwei kiwei.
Ka jingthmu jong ka Seng Samla ban pynlong ïa ka Winter Games ka long ban pynshlur ïa ki khynnah bad ki samla ba kin mih shakhmat ban ïashim bynta bad kumjuh ban ailad ïa ki ba kin sei ïa ki sap bad ki talen kaba ki don bad ruh kaba wanrah ïa ka jingïadei bad ka jingïajan hapoh shnong hapoh thaw.
Lyngba kitei ki sngi, la ïoh ban sakhi ïa ka jingïashim bynta shitrhem naduh ki khynnah haduh kiba la heh la san bad ka long shisha ka jingjop lyngba ka jingïashim bynta ka jong ki para nongshong shnong. La pynhap pyrda ïa kane ka Winter Games ha ka 27 tarik, Kyllalyngkot ha kaba la sakhi lang da u MLA ka Mawlai konstitwensi u Bah Brightstarwell Marbañiang kum u kongsan ryngkat ka jingïadonlang u Bah S. Niangmih, Rangbah Shnong Mawlai Umshing Umjapung, Bah P. Shabong, Secretary Mawlai Umshing Umjapung ryngkat ki dkhot ka Executive Committee bad kiwei ki nongshah khot sngewbha.
La pynshngaiñ ruh da ka jingïadonlang jong ka Seng Longkmie, ki Village Organisation jong ka shnong bad ki nongshong shnong baroh. La ïoh ïa ka jingsam Prize sha ki nongjop bapher bapher bad la pynshongshit da ka jingrwai , jingshad da ki nongjop bad ki nongïashim bynta.
Na ka liang ka seng Samla shnong ka la pynpaw ka jingai khublei ïa ka jingïarap bad ka jingkyrshan ïa ka seng kaba kynthup naduh ki nongmihkhmat jong ka Mawlai konstitwensi, Bah Brightstarwell Marbañiang, MLA, Bah Teiborlang Pathaw, MDC, Bah P.T. Sawkmie MLA barim, ki MLA kiba shong basah hapoh ka shnong, Bah Olan Suiñ MLA Mawsynram konstitwensi bad Bah M. Kurbah, MLA Mawphlang konstitwensi, ka Dorbar Shnong Mawlai Umshing Umjapung kynthup ki nongshong shnong, ka Chilli Breeze, Novel Cakes and Bakes, Sha Ri Loum Homestay, Manna Inspira Homestay, Dorsen Homestay, Bah Baristar Warjri trai ka SS Departmental Store bad kiwei kiwei.
Ka seng Samla ka pynpaw ruh ka jingkhublei ïa ka ophis jong ka Deputy Commissioner East Khasi Hills District kaba la ai jingïarap bad jingkyrshan lyngba ka CMYDS 22-23. Khatduh ïawai, ka seng Samla ka kyntu bad pynshlur ïa ki khynnah rit bad ki samla jong ka shnong ba kin kiar na ka jingpynmlien ïa ki kam sniew kiba la jur ha ka imlang-sahlang bad ba kin ïai minot ha ki jingpule bad ban pynmlien ïalade ban ïashim bynta ha ki jingïalehkai ki ban kyntiew ïa ka imlang ka sahlang bad ïa ka jylla hi baroh kawei.
