Shillong, K’Lyngkot:
U kyrtong uba la mih shakhmat ban ïa aireng ha kane ka ilekshon MP ban wan, u Prof. Lakhon Kma u la thoh sha u Myntri ka tnad pule-puthi ka Jylla, u Rakkam A. Sangma halor ki jingpynkhreh ka Sorkar na bynta ka jingpyntreikam ïa ka Common University Entrance Test (CUET) ha ka kyrdan pule Under Graduate (UG).
“Naba ka pule-puthi ka dei ka mat kaba hap ban khmih lang da ka Sorkar Pdeng bad Sorkar Jylla kumjuh, ka Sorkar Jylla ka dei ban ong eiei halor kumno ban ïaid shakhmat naba tang ha kine ki khyndiat bnai, ka kam ba ïadei bad ka jingwad klas na bynta ka jingpule UG kan sa sdang,” la ong u Prof. Kma ha ka shithi ba la phah sha u Myntri.
Haba kdew ba ka jingthmu ka CUET ka long ban pynbiang ïa ka rynsan bad ki kabu ba mar katjuh sha ki kyrtong ha kylleng ka ri, khamtam kito na ki jaka kyndong, utei u nonghikai ka skulbah NEHU u khmih lynti ba ka Sorkar Jylla ka la pynkhreh ïa ki jingdon-jingem kiba donkam na bynta kane ka eksamin kaba ïar katkum ka juk stad ba mynta (computer-based online test).
“Sngewbha pyntikna ba ka National Testing Agency (NTA) kan pynkhreh bha shuwa, ha ryngkat ka jingïatreilang bad ka Sorkar Jylla khnang ba ki jaka thoh eksam kin long kiba biang ha ryngkat ki kor komputor lem bad ka jingsted ha ka liang ka lad pynïasoh ‘internet’ bad ka bording ha kylleng ki distrik ka East Khasi Hills, West Khasi Hills, South West Khasi Hills, Eastern West Khasi Hills, East Jaiñtia Hills, West Jaiñtia Hills bad Ri-Bhoi distrik bad ka Jylla hi baroh kawei,” la ong u Prof. Kma.
Ha kajuh ka por, u la ong ba ki samla pule kim dei ban mad jingeh ne duh ïa ka lad ban ïoh ïa ka jingpule ba shajrong tang namar ka jingbym biang ki lad jingpynkhreh na ka liang ka NTA ne Sorkar Jylla.
“Ym dei ban pynbor ïa ki samla pule ban phah thoh eksamin ïa ki sha ki jaka thoh eksam ka NTA kiba shabar ka Jylla, ha kawei ka liang ka ban buh jingeh ïa ki ha ka pisa-tyngka khamtam na bynta kito na ki jaka nongkyndong kumjuh kiba duna ha ka ïoh ka kot,” u la ong da kaba ai nuksa ïa ka eksamin NET ha u snem ba la dep, ha kaba ki samla pule ki hap leit thoh eksamin ha ki jaka thoh eksam ka NTA kiba ha Ranchi, Agartala, Dibrugarh bad kiwei-kiwei namar bym biang ki jaka thoh eksam ka NTA hapoh Jylla.
U la ong ruh ba katkum ka jingtip jong u, tang ka NEHU kaba don ïa ka NTA Centre kaba biang ha Shillong bad kane ha kawei ka liang kan long ka jingeh kaba khraw na bynta ki samla lada ym shimkhia ha ka por kaba biang.
“Ka long kaba donkam ruh ba ka Sorkar kan mih shakhmat bad ki kyndon ba ïadei bad ka jingrung klas ka ban ym kyntait ïa ki ‘mark’ ba la ïoh pdiang ha ka prokram UG kaba 3 snem bad ym ban shaniah tylli-tyllan ha ki jingïoh na ka CUET na bynta ka jingmyntoi ki samla jong ngi,” la ong u Prof. Kma
Shuh shuh u la bynrap ba lada donkam, un sa thoh ruh sha u Myntri ka tnad pule-puthi ka Sorkar Pdeng, u Dharmendra Pradhan kumjuh sha ka President ka India, ka Droupadi Murmu na bynta ka jingtuklar ba biang por jong ki.
