Ranchi, K’Lyngkot 31 (UNI)
U Myntri Rangbah ka Jharkhand, u Hemant Soren, uba la hiar shuki ha ka Sngi Balang, u la shah kem noh ha ka Enforcement Directorate (ED).
Utei u nongïalam ka seng Jharkhand Mukti Morcha (JMM) u la shah kem hadien bun kynta jong ka jingtohkit da katei ka kynhun ha kaba ïadei bad ka jingkynnoh ba ka la don ka jingbamsap bamngem ha kaba ïadei bad ka jingdie jaka sorkar.
Ha ka jaka jong u Hemant, la jied ïa u Myntri ka tnat Transport, u Champai Soren, ba un long kum u nongïalam bathymmai jong ka sorkar. Na ka liang u Champai u la leit sha u Lat ban pyni ïa ka jingdon ki MLA kiba kyrshan ïa u ban long u Myntri Rangbah bathymmai ka Jharkhand.
Hashwa kane, ha ka por janmiet, u Hemant u la leit sha ïing sah u Lat ha ryngkat ka kynhun ED bad u la aiti ïa ka shithi iehnoh kam. Ki tyllong khubor ki ïathuh ba u Lat u la pdiang ïa ka shithi iehnoh kam jong u Hemant.
Hynnin ka sngi, ki la don ki lad pathai khubor kiba la pynbna ba ka kurim jong u Hemant, ka Kalpana Soren, ka lah ban shimti ïa ka shuki Myntri Rangbah lada jia ba une u nongïalam u shah kem ha ka ED. Hynrei ka khlem shym la jia kumta.
Na ka liang u President ka seng Congress ha Jharkhand, u Rajesh Thakur, u la ong ba ki MLA ka JMM bad kiwei pat ki seng kiba kyrshan ïa ka sorkar, ki la jied ïa u Champai Soren ban long kum u nongïalam bathymmai.
Ki la don haduh 43 ngut ki MLA na ki lai tylli ki seng – JMM, Congress bad RJD – kiba la ai ïa ka jingkyrshan ïa u Champai kum u nongïalam. Ki tyllong khubor ki ïathuh ba u Lat u la ai ktien ha u Champai ba un sa shim ïa ka rai ynda u la peit bniah nadong shadong.
Hynne ka sngi, ki heh ka ED ki la poi ha ka ïing sah u Hemant ha ryngkat ka jingsynran ki pulit CISF bad ki la sdang ban kylli jingkylli ïa u halor katei ka jingkynnoh bamsap bamngem.
Na ka liang ki nongkyrshan ka JMM kiba la ïalum hajan ïing jong u Hemant, ki la pyrta shla pyrshah ïa ka ED bad ki la pynpaw ïa ka jingkyrshan ïa u.
Lah ban kdew ba ha ka 20 tarik Kyllalyngkot, u Hemant u la shah tohkit ha ka ED ha ka ïing sah jong u na ka bynta 20 kynta. Hadien kata, ka ED ka la thoh sha u ba ka kwah ban tohkit biang hapdeng ka 27 bad 31 tarik Kyllalyngkot. Ha ka 25 tarik Kyllalyngkot, u Hemant u la kyrngah ban shah tohkit biang bad u khlem aipor ïa ka ED ba kan tohkit biang ïa u.
Ha ka 29 tarik Kyllalyngkot, u Hemant u la thoh sha ka ED bad u la kynnoh ba ka dei ka kynhun kaba treikam katkum ka jinglong ka saiñpyrthei bad ba ka khanglad ïa ka sorkar ba la jied da ki paidbah ba kan treikam ha ka rukom kaba dei.
Hynrei u Hemant u la phah ruh da ka jingthoh lyngba ka ’email’ sha ka ED ha kaba u la mynjur ba un jubab ïa ki jingkylli ha ïing sah jong u ha ka 31 tarik Kyllalyngkot bad u la phah wan ïa kane ka kynhun ha ka por 1 baje mynsngi.
