Shillong, K’lyngkot 31
U Bah Carnes Sohshang uba dei u MDC ka Congress na Mawkyrwat bad Executive Member (EM) ka Khasi Hills Autonomous District Council (KHADC), u la kren shai ba un nym kyrshan ïa u Bah Robertjune Kharjahrin uba dei u kyrtong monlang jong ka UDP bad HSPDP ha ka ilekshon MP Lok Sabha wat la u dei na kajuh ka thaiñ kajuh ka konstitwensi.
Haba kylli, phin kyrshan ne em ïa u Bah Robertjone Kharjahrin namar phi dei na kajuh ka thaiñ, u Bah Carnes u la kren shai ba um lah ban kyrshan namar ki don la ka jong ka seng saiñpyrthei, hynrei u hap ban kyrshan beit ïa u kyrtong MP Lok Sabha ba la pynïeng da ka seng Congress u Bah Vincent H Pala.
“U Bah Robertjune u la dep kyrpad ïa nga ban kyrshan lem ha kane ka ilekshon MP haba u ïakhun na ka seng UDP hynrei nga la kren shai ba nga hap ban kyrshan ïa u kyrtong ba la pynïeng da ka seng Congress namar nga dei u MDC ba la pynjop da ka seng Congress” u la ong.
Nalor nangta, u Bah Carnes u la pynpaw ka jingsngewtynnad ïa u Bah Robertjune kum u paralok uba mih na kajuh ka thaiñ ban ïakhun ïa ka ilekshon MP na ka seng UDP, hynrei un nym lah ban kyrshan namar u hap ban kyrshan ïa ka seng Congress.
Ha kajuh ka por u Bah Carnes u don jingkyrmen ba ki paidbah ki dang ai jingkyrshan biang ïa u kyrtong ka Congress ha kane ka ilekshon MP sha ka Lok Sabha.
Kum ban shu pynkynmaw, u Bah Robertjune Kharjahrin u dei u President ba dang shu shongthait na ka seng HYC bad ha ka ilekshon MLA ba dang shu dep u la kyrshan ïa u kyrtong ka UDP u Bah Renikton Lyngdoh haduh ba un da ïoh jingjop na Mawkyrwat konstiwensi.
Ha kane ka ilekshon MP Lok Sabha na Shillong Konstitwensi, ki la don lypa san ngut ki kyrtong kiba la mih shakhmat ban ïakhun, kata u kyrtong ka Congress u Bah Vincent Pala uba la dei lypa u MP Lok Sabha, ka Kong Ampareen Lyngdoh na ka NPP, u Bah Robertjone Kharjahrin na ka UDP, u Dr. Ricky AJ Syngkon na ka VPP bad u Prof. Lakhon Kma.
