Shillong, K’lyngkot 31
Ki ar tylli jaka pule Nurse ha nongbah Shillong kin sa kylla noh kum ki kolej bad kane kan plie lad ruh ïa ka Sorkar Jylla ban pyntreikam noh ïa ka Shillong Medical College bad sdang ïa ka jingpule doktor (MBBS).
Kine ki jaka pule Nurse ki kynthup ïa ka School of Nursing ha Shillong Civil Hospital bad ka School of Nursing ha Ganesh Das Government Hospital, Lawmali, Shillong.
La ïathuh ba kine ki jaka pule nurse ki dei kiba la shakri la bun phew snem bad kin sa kiew sha ka kyrdan kolej na ka bynta ban ïoh sdang ïa ka jingpule doktor lyngba ka Shillong Medical College.
Ka Sorkar Jylla ka la dep rai ban shim ki lad ki lynti ban sdang pyntreikam noh ïa ka Shillong Medical College da kaba sdang ïa ka jinghikai ban pule doktor ha Shillong Civil Hospital bad Ganesh Das Government Hospital.
Ka tyllong khubor ka ïathuh ban kyntiew kyrdan ïa kine ar tylli ki jaka pule Nurse, ka Sorkar Jylla kan mang pisa palat T.5 klur na ka bynta ban pynbit pynbiang katto- katne ki jingdonkam kynthup ka jingpynbha ïa ka jaka pule bad kiwei kiwei ki jingdonkam kiba kham hakhmat eh.
Kat haduh mynta, ym pat lah ban sdang ïa ka jingpule doktor hapoh ka Jylla bad ki samla kiba leit pule MBBS bad kiwei ki jingpule doktor ki hap leit pule ha ki jaka pule kiba don shabar ka Jylla.
Namar kata, ka Sorkar MDA ka la shimkhia ïa kane da kaba jied ïa kitei ar tylli ki jaka pule nurse ba kin long noh ki jaka ai jinghikai ïa kiba pule doktor.
