Shillong, Rymphang 01
Ka Hynñiewtrep Integrated Territorial Organisation (HITO) Shillong City ha ka Sngi Palei ka la ïoh ban bat haduh 18 ngut ki bar jylla na Mawlai By-pass kiba thmu ban wan kiew shapoh Shillong.
Haba kren sha ki lad pathai khubor, na ka liang u samla Banpyntngen Syiemlieh, President ka HITO Shillong City, u la ïathuh ba katba ka seng ka dang ïaid lynti lyngba katei ka surok ka la lap bad ïohi pynban ïa kitei ki bar jylla kiba la ïohlad ban rung haduh ha Mawlai.
U la ïathuh ba ha katei ka jingtohkit la lap ba ki don 18 ngut ki bar jylla kiba thmu ban wan bylla shapoh Shillong bad 3 ngut ki nongñiah kali bad lai tylli ki kali shimet kiba la pyndonkam da kitei ki bar jylla ban wan shapoh kane ka jylla.
U samla Banpyntngen u la ong ba kitei ki bar jylla ki dei kiba la wan na Assam bad na ki shnong kiba marjan jong ka Assam ha kaba ki khlem don satia ïa ki kot ki sla kiba biang ba kin wan trei wan ktah hapoh ka jylla Megahalaya. U la ong ruh ba kum ka seng ka la pynpaw ïa ka jinglyngngoh namar ba kitei ki bar jylla kim tip shano ki thmu ban leit lane mano ba phah ïa ki ban wan shapoh kane ka jylla.
Ka seng ka la pyntip ba kan ap ïa kita ki briew kiba kitkhlieh ïa ki ban wan trei shapoh ka Ri Khasi ba kin wan ïakynduh ïa ka seng. Lada kitei ki briew ki pynslem bad kim wan mih shakhmat, ka seng kam banse ban phah leit noh ïa kitei ki bar jylla na ka jaka kaba ki wan.
“Na ka liang jong ngi ka seng, ngin ap ba kin wan kita ki briew kiba wan ïalam bad kiba kitkhlieh ïa kine haduh ba kin da ïoh wan rung ban trei hangne, kum ka seng kan ïai ap ba kin wan shakhmat hynrei lada ki pynslem, ngin pynphai ïa ki bad ngin sa buddien nangne shakhmat”, la ong u samla Banpyntngen.
Ka seng ka la dawa ruh ba ki bor ba dei khmih ki dei ban shimkhia ïa ka jingwan rung ki bar jylla shapoh ka jylla namar ka jingwan rung ki bar jylla kumne na ka por sha ka por, ka ktah bha ïa ka kam bad ka jam jong ki khun samla trai ri-trai muluk.
“Kum ka pyrthei mynta kaba jynjar kam, lada ïa kine ym lah ban tehlakam wat tang ha ka shisngi ngi la lap ba ki don da ki 20 tam, shu kheiñ ha ka shibnai lei katno tam ki wan ban rung shapoh ka Ri Khasi jong ngi bad kaba la pynlong pat ïa ki khynnah samla jong ngi ban jynjar ha ka ïoh kam ïoh jam”, la kubur u samla Banpyntngen.
Na ka liang ki pulit ka thanat Mawlai ki la leit ban shimti noh ïa kitei ki bar jylla ban rah shapoh thanat.
