Shillong, Rymphang:
Ka seng Hynñiewtrep Youth Council (HYC) ha ka Sngi Balang ka la leit ban ïakynduh ïa u Director ka North Eastern Indira Gandhi Regional Institute of Health and Medical Sciences (NEIGRIHMS), u Dr. Nalin Mehta ban ïakren halor ka rukom thungkam thungjam hapoh katei ka jaka ai jingsumar. Hynrei ha katei ka jingshah khot ban ïakren, na ka liang u Director ka NEIGRIHMS u la kren bad kynnoh pynban ba katei ka seng ka la wan sha katei ka jaka ban thaw bad pynmih jingkulmar hapoh katei ka jaka ai jingsumar.
Kane ka jingwan jong ka seng ban ïakren bad u Director ka long ban ïakren ha kaba ïadei bad ka rukom thungkam thungjam bad kiwei kiwei ki mat kiba ka seng ka lah thmu ban ïakren hynrei namar ka jingkren kynthah jong utei u Director ïa ka seng, na ka liang ka seng da ka jingbitar ka la mih noh jyndat shabar bad ka la byrngem ruh ban khang khyrdep noh ïa katei ka jaka treikam u Director.
Wat la ka jingïakren bad u Director kam pat shem la sdang hynrei tang ha ki khyndiat minit ba ka seng ka la rung shapoh ka kamra treikam utei u Director, ka seng ka la mih jyndat noh da ka jingbitar.
Shuh shuh na ka liang ka seng ka la rai ban beh noh ïa ki nongtrei bad kan khang tala noh shisyndon ïa ka Administrative Building jong ka NEIGRIHMS.
Ka seng ka la pynpaw ba utei u Director u khlem shym la kren eiei satia ïa ki nongïalam ka seng hynrei u la shu kren siat bad utei u Director u la leh kumba kitei ki nongïalam ka seng ki dei ki khynnah surok.
Ka seng ka la ong ba ka jingkren siat jong utei u Director ïa ki nongïalam ka seng ka dei tang ka buit ban pyni ba um kwah satia ban ïakren bad ïakynduh bad ka seng khnang ba ka seng kan nym ïakren shuh ïa kitei ki mat namar kitei ki mat ki dei na ka bynta ka jingmyntoi ki paradoh ki parasnam. Lehse kane ka jingleh jong utei u Director ka dei ba u kwah ban thep kam da ki paradoh parasnam jong u lane da ki briew kiba u ithuh.
Hadien kumba katto-katne por eiei, utei u Director ka NEIGRIHMS Hospital, Dr. Nalin Mehta u la leit ban pyndem toiñ hakhmat ka seng HYC ha kaba la ïohi ruh ba u la wan hi dalade sha phyllaw ka jaka treikam ban panmap na ka seng halor ka jingleh bakla ka jong u.
Ha katei ka jingïakren habar jong ka phyllaw treikam, u Dr. Mehta u la panmap na ka seng da kaba u la ong ba lada ka jingmih jyndat jong ki nongïalam ka seng hapdeng ka jingïalang ka dei namar ka jingleh ne ka jingkren bakla jong u kin sngewbha ban map ïa u.
U la kyrpad ïa ka seng ba kan ym khang tala satia ïa katei ka jaka jingsumar namar kane kan ktah ïa ki paidbah nongwan phah sumar ha katei ka jaka.
Na ka liang u Bah Roy Kupar Synrem, u la ong ha utei u Director ba ka jingwan jong ka seng ha katei ka jaka ruh ka dei namar ka jingshah khot ha utei u Director. Kane ka jingkren bad ka jingleh jong u Director ïa ka seng ka long ka bym ïahap satia.
U la ong ba na ka liang jong utei u Director u la ong ba ka seng ka dei ban wan ïalam tang 5 ngut ki dkhot ka seng ban ïakren. Na ka liang ka seng ruh ka la leh kumba la bthah hynrei tang sdang ym pat sdang ka jingïakren, utei u Director pat u la kynnoh pynban da kumne-kumtei ïa ka seng.
Na ka liang u Vice President ka HYC, u Bah Donboklang Kharlyngdoh hadien ka jingwan panmap jong utei u Director u la kyntait ban ïakhublei kti.
U Dr. Mehta u la ai ka jingkhublei kti ïa u Bah Donboklang kum shibynta ban pynpaw ïa ka jingïatreilang bad ki sengbhalang. Hynrei na ka liang ka seng namar ka jingbitar halor ka jingkynnoh jong utei u Director ba ka seng ka la wan ha katei ka jaka da ka jingthmu ban pynkulmar, kumta u Bah Donboklang u la kyntait ïa ka jingkhublei kti.
