Shillong, Rymphang:
Ka Khun Hynñiewtrep National Awakening Movement (KHNAM) ka la thoh da ka shithi sha ka Dorbar Shnong Rynjah bad ka la kyrpad ba dei ban weng noh ïa ki jingthoh lane ki ‘signboard’ kiba thoh ka “RR Colony” napoh ka shnong bad ba dei ban bujli noh da kiba thoh “Them Rynjah”.
Ka KHNAM ka la pynkynmaw ïa ka Dorbar Shnong ba ka Hima Mylliem ha u snem 2019 ka la kynthup ïa ka Relief and Rehabilitation Colony ïa kaba la tip kum ka Refugee Colony hapoh u pud u sam jong ka Dorbar Shnong Rynjah bad ïa kane ka kam la ïoh jingmynjur na ka Khasi Hills Autonomous District Council (KHADC).
Na ka liang ka Hima Mylliem ka la bthah ba ïa ka kyrteng jong katei ka shnong yn tip noh kum ka Them Rynjah nangne shakhmat. Hynrei na ka liang ka KHNAM mynta ka sngi ka la pynpaw ka jingkyndit ba kane ka hukum bad kane ka jingbthah ym shym la pyntreikam satia.
