Shillong, Rymphang 01
Hadien ba ka sorkar jylla ka la pyllait paidbah ïa ka jingrwai ieid ri lane ka ‘State Anthem’ kum shibynta ka jingrakhe ïa ka jingdap 52 snem ka jingïoh ïa la ka jong ka jylla, ki la mih shibun ki jingbymhun bad ki jingsngewdiaw na ki kynhun bapher bapher halor ka jingbym shah kynthup lang ka ktien Jaiñtia hapoh katei ka jingrwai ieid Ri.
Kum ban shu kdew hangne, ha katei ka jingrwai ieid Ri la kynthup tang ïa ka ktien Khasi, Garo bad Phareng.
Ha kaba ïadei bad kane kajuh ka bynta, ha ka 1 tarik u Rymphang 2024 ka la mih sa kawei ka kynhun na Ribhoi ïa kaba la tip kum ka Synjuk ki Rangbah Shnong Ribhoi District ka la wan ban aiti da ka dorkhas hakhmat u Symbud Myntri Rangbah ka jylla, u Bah Prestone Tynsong ban dawa na ka sorkar ban kynthup lang ïa ka ktien Bhoi hapoh katei ka jingrwai ieid Ri ha ryngkat bad kiwei-kiwei de ki mat jingdawa kiba ka seng ka don.
Haba kren sha ki lad pathai khubor, u Chairman jong ka Synjuk, u Bah Bunbuhai Makdoh, u la ong ba kumba kiwei ki kynhun ki dawa, kumta na ka liang ka Synjuk napoh Ribhoi ka sngew ba ka don ïa la ka jong ka hok ban dawa namar ba ka Ribhoi hi ka don ïa la ka jong ka kolshor bad ka ktien ka thylliej bad ka jingkynthup ïa ka ktien Bhoi hapoh katei ka jingrwai ieid ri kan long kum ka dak ban pynpaw ïa ka jingriewspah jong ka kolshor.
“Namar ba ka Ribhoi hi, ka don ïa la ka jong ka kolshor, ka ktien ka thylliej bad ngi don ïa la ka jong ka jingrwai ieid Ri kaba la paw bad kaba la slem bha, kumta ngi kwah ba ka ktien Ribhoi ka jong ngi ruh dei ban pynrung lang hapoh ka ‘Meghalaya Anthem’ kum kawei na ki ktien hapoh ka Ribhoi District jong ngi”, la ong u Bah Makdoh.
Na ka liang u Symbud Myntri Rangbah pat u la ong ba ka sorkar kan sa bishar bniah shwa ha kaba ïadei bad katei ka jingdawa bad um pat ai satia ïa kano-kano ka rai.
“Ngi kwah hi ruh ba ka ktien ka thylliej jong ngi ki Ribhoi kan rung lada dei tang shilaiñ ne arlaiñ ruh ngi la hun”, la ong u Bah Makdoh.
U la ong ba kane kadei tang ka jingkynthup ïa ki ktien khnang ban pynpaw ïa la ka jong ka kolshor bad ka jingriewspah ka jylla ha ka ktien ka thylliej bad u la ong ba kan ktah leh aïu ïa kata ka jingïapait bad jingsngewïapher jaitbynriew.
“Namar kane ka dei tang ka jingkynthup ïa ki ktien khnang ba ngin pynpaw ïa la ka jong ka kolshor bad ïa ki ktien kiba ngi don, te kan ktah aiu ka jingïapait bad ka jingsngewïapher Jaitbynriew, baroh ngi dei ki Khasi Khara hynrei ngi shu kwah tang ban pynrung ïa la ki jong ki jong ki ktien tynrai kiba ngi don”, la ong u Bah Makdoh.
