Shillong, Rymphang 01
Ki shipai BSF kiba pahara ha khappud ki la ïoh ban kurup noh ïa ka kyiad kaba la thmu ban khaïi tuh sha Bangladesh bad la ïoh ruh ban kem ïa ar ngut ki nongdie kyiad.
Ha u kyrwoh, ki BSF ki la pyntip ba ha ka Sngi Balang hadien ba ki la ïoh jingtip kaba thikna ki la pynlong ïa ka jingpynap shrip bad ki la ïoh bat ïa kawei ka kali. Haba pynlong ka jingtalasi la lap ba katei kali ka kit da ka kyiad kaba don haduh 356 bilor. Kumta na ka liang ki BSF ki la kem noh ïa u nongñiah bad ïa u nongbud jong ka kali kiba dei ki nong India bad la kurup noh ïa ka kyiad kaba don hapoh kali.
Nalor nangta, ki BSF ki la ïathuh ba ïa katei ka kyiad la thmu ban khaïi beaiñ sha ri Bangladesh lyngba ka thaiñ khappud kaba don ha West Jaiñtia Hills District.
Ïa kiba la shah kem ryngkat bad ka kyiad kaba la kurup la aiti noh sha ka tnat Custom kaba don ha Dawki na ka bynta ban leh ïa kaba donkam.
