Shillong, Rymphang 01
U Lamphang ka ïingdorbar thawaiñ ka jylla, u Thomas A Sangma, ha ka Sngi Palei u la ong ba ka ïingdorbar ka kwah ban pyndonkam noh da ka kor Artificial Intelligence (AI) hapoh ka ïingdorbar ka ban ailad ïa ki dkhot ban kren ha ka ktien lajong.
Haba kren sha ki lad pathai khubor, u Thomas A Sangma u la ong, “Ngi dang wad ka jingïarap na ki agency kiba ïadei bad kane ka bynta bad kumjuh ruh na ki riewshemphang ban pynrung ïa ka Artificial Intelligence (AI) ha ka jingshong dorbar ka ban wan.
U la ong ba ka jingthmu jong kane, ka long ban ailad ïa ki dkhot ba kin kren da la ki jong ki ktien bad ka jingphai khmat ka long ban lah ban pynkylla ïa kine ki ktien sha ka phareng lyngba ka Artificial Intelligence.
U Lamphang u la ban jur halor ka jingdonkam ban ithuh noh ïa ka ktien Garo bad ktien Khasi-Jaiñtia bad ha kaba u la dep ban jied ïa ka thup kyrteng jong ki riew shemphang ban ïarap halor kane ka bynta bad ha ka por long dorbar, kine ki agency kin don lang ban peit pyrman bad ai ïa ki jingai jingmut ki jong ki.
Haba kubur halor ka jingïaid jong ka ïingdorbar shakhmat ban pynduna ka jingpyndonkam ïa ki kot ki sla, u Lamphang u la ong ba haduh mynta kim pat lah ban kot sha ka 100 persen jong ka jingpynduna pyndonkam ïa ki kot hynrei ki la don pat ki dkhot kiba la mynjur ban pdiang ïa ki ‘notification’ ha ka rukom khlem pyndonkam ïa ki kot.
Ha kawei pat ka liang, u Lamphang u la pyntip ba ka dorbar mang tyngka jong ka ïingdorbar thawaiñ ka jylla kan sdang naduh ka 16 tarik haduh 27 tarik Rymphang.
U Lamphang u la pyntip ba ka Business Advisory Committee (BAC) ka la ai ka jingmynjur ïa ki sngi bad tarik na ka bynta ka dorbar mang tyngka. U la ong ba ka jingshong dorbar kan long phra sngi, bad ka BAC ka la mynjur ruh ban buh haduh san sngi na ka bynta ban ïakren ïa ki kam ba wanrah da ka sorkar bad lai sngi na ka bynta ban ïatai ïa ki kam ba wanrah da ki dkhot shimet shimet (private member business).
U Lamphang u la pyntip ba ïa ka mang tyngka jong ka Jylla yn wanrah ha ka 21 tarik Rymphang da u Myntri Rangbah ka Jylla.
Shuh shuh u Lamphang u la pyntip ba ka jingkhot ban pynlong kloi ïa ka jingshong dorbar ka dei namar ka jingdon ïa ka ilekshon MP. “Ngi donkam ban pyndep noh baroh ki kam ha shwa ban wan ka jingpynbna ban pynlong ïa ka ilekshon,” la ong u Lamphang.
