Shillong, Rymphang 01
Wat lada ka Sorkar Pdeng kam pat pynlong ïa ka khanasamari (census) na ka bynta ban ïoh jingtip kaba tikna haba ïadei bad ka jingdon ki longïing bad ki briew ha ka ri baroh, hynrei ka Sorkar Meghalaya ka la nang ïaid ban lum jingtip bad ai jingkheiñ ha ki bynta bapher bapher.
Ha ka jingshisha, ka khanasamari ha baroh kawei ka ri, dei ban pynlong ha u snem 2021, hynrei na ka daw ka jingwan lynshop ka jingpang COVID, la hap ban pynsangeh ha baroh kawei ka ri ïa ka khanasamari.
Ka khanasamari ka dei kaba ju pynlong shisien shiphew snem bad kaba pynlong khatduh ka dei ha u snem 2011.
Kumta da ka jingbym don ka khanasamari, ka Jylla bad ka Ri kim don ka jingai jingkheiñ kaba tikna naduh ka jingdon ki nongshong shnong, ki jingdonkam ki longïing longsem bad ka jinglong jingman ka ïoh ka lot jong ki nongshong shnong nalor kiwei kiwei ki jinglum jingtip khnang ban lah ban pynwandur ïa ki mat treikam jong ki.
Ka tyllong khubor ka ïathuh ba ka Directorate of Statistics and Economics ka la nang lum jingtip khnang ban kham suk ka rukom treikam naduh ka jingdon ki nongïoh myntoi na ki skhim bapher bapher ba pyntreikam ka Sorkar Pdeng bad ka Sorkar Jylla ban myntoi ki paid nongshong shnong.
