Shillong, Rymphang 01
U MLA ka Congress na Mylliem, Bah Ronnie V Lyngdoh, ha ka Sngi Palei u la ong ba ka Meghalaya Pradesh Congress Committee (MPCC) ka la pynkhreh ïa lade na ka bynta ka ilekshon sha ïingdorbar Lok Sabha da kaba pynpaw ïa ka kyrteng jong ki kyrtong ban ïakhun na Shillong bad Tura Parliamentary Konsti-twensi.
“Hynrei lada ka wan ka jingbthah na ka All India Congress Com-mittee (AICC) ngin hap ban ïaid bad kohnguh ïa ka. Kumba ka long mynta, ngim shym la ïoh jingpyntip eiei halor ka jingïabhah konstitwensi bad namarkata, ngi hap ban pynbna ïa ki kyrtong ki jong ngi bad hadien lada ka don kano-kano ka jingbthah ban ïatreilang bad kiwei ki seng saiñ pyrthei, ngin sa ïa peit,” la ong u Bah RV Lyngdoh uba dei ruh u Nongïalam ka Liang Pyrshah hapoh ka ïingdorbar thawaiñ ka jylla haba kren sha ki lad pathai khubor.
Lah ban pynkynmaw ba ka TMC ka don jingthmu ban ïakhun ïa ka ilekshon MP na kawei na ki konstitwensi ha Meghalaya bad kaba lah ban dei na Tura.
Kumba ka long mynta, ka Agatha K Sangma jong ka seng National People’s Party (NPP) ka dang dei ka MP kaba mynta na Tura.
Lah ruh ban pynkynmaw ba ha ka Lah Sngi U Blei, ka Screening Committee ba la thaw da ka AICC ka la mynjur ïa ka kyrteng jong u MP ba mynta ka Shillong u Bah Vincent H Pala ban ïakhun na Shillong bad u MLA na Gambegre u Saleng A Sangma ban ïakhun na Tura Parliamentary Konstitwensi ha ka ilekshon MP ka ban sa long.
Shuh shuh u Bah Ronnie u la pyntip ruh ba ha ka jingïalang kaba la long ha Guwahati, kam shym la don satia ka dak ba kan don ka jingïabhah konstitwensi na ka bynta ka Meghalaya ha ka jingïatreilang hapoh ka INDIA Bloc.
Ha kawei pat ka liang u Bah Ronnie u la ong ba ka jingkynthih dieng kper jong u MDC ka Mairang sha ka NPP kan don ka jingktah katto-katne ïa ka Congress ha kane ka ilekshon Lok Sabha.
“Hynrei nga kwah ban kren shai ba kane ka ilekshon, kam dei ka ilekshon MDC ne MLA hynrei ka dei ka ilekshon MP ka ban mihkhmat ïa ngi sha Parliament,” u la ong bad bynrap ba kum ki paidbah ki dei ban bishar ïano kin phah.
Halor ka jingkynthoh ka kyrtong ka NPP ka Kong Ampareen Lyngdoh pyrshah ïa u MP ba mynta ka Shillong u Bah Vincent H Pala, u Bah Ronnie u la ong ba kum kine ki jingkynthoh kin don beit ha ka por ïalap ilekshon, ka bym dei shuh kaba thymmai.
U la ong ba ka Congress kan nym kheiñ sting satia ïa kino-kino ki kyrteng na kino-kino ki seng hynrei kan ïaleh ban pynkhlaiñ ïa la ka seng khlem da phai khmat sha ki kyrtong jong kiwei pat ki seng.
Haba kylli, u Bah Ronnie u la ong ba ka mat kaba hakhmat eh jong ka Congress ha kane ka ilekshon MP ban wan ka long ban ïakhun ïa ka hok jong ki paid nongshong shnong, namar kumba long mynta, ka jinglong jingman na ka bynta ka lawei ban wan ka don ha ka jingma kaba khraw.
Nalor nangta, u la ong ka Sorkar India hapoh ka jingïalam ka BJP mynta la sakhi ba ki lad pathai khubor kim long laitluid shuh lane ban thoh pyrshah ïa ka sorkar. Lada ki lad pathai khubor ki kynnoh ki kynthoh, ka sorkar India ka pyntieng da kaban pynlong ïa ki jingtohkit lyngba ki CBI, ED bad kiwei ki Agency bapher bapher.
Shuh shuh u Bah Ronnie u la ong ruh hapoh ka jingïalam jong kane ka sorkar la sakhi ïa ki jingma kiba buh ïa ka riti synshar jong ka Ri, ki aiñ ki kanun, ka hok mane Blei ka don hapdeng ka jingma bad kiwei kiwei kiba u paidbah u la duh noh.
U Bah Ronnie u la ong ba dei lyngba ka Bharat Jodo Nyay Yatra ba la lamkhmat da u Rahul Gandhi, ba u la ïeng ban kren pyrshah ïa ka jingleh ka Sorkar Kmie.
U la ong ba lyngba kane ka Bharat Jodo Nyay Yatra u Rahul Gandhi u la kren shaphang ki hok jong u paidbah kiba la sdang duh mynta bad ha manla ki jaka kiba u Rahul Gandhi u ïuhkjat, la sakhi ïa ka jingshitrhem ki paidbah ban wan ai jingkyrshan namar ki thrang bad angnud ban don uwei u ban mih shakhmat na ka bynta ban kren halor ka hok jong ki.
