Shillong, Rymphang 01
Ki nongdie waidong, sikret kiba shong harud surok ha Umïam hajan ka lad ban leit sha Nongsder, Ri Bhoi district ki la pynpaw ba kin sa ïap thngan lada ka sorkar kan khang shipor ban ïaid ki kali na Shillong sha Them Ri Bhoi katba dang shna ïa ka jingkieng ha Umïam.
Kine ki nongshong die waidong ha mar pyrshah ïa ka Orchid Lake Resort Umïam ki don kumba 5 ne 6 ngut kynthup ïa kiba die riewhadem ba shu thang bad kiba die soh kiba shong ha trai diengjri ki la pynpaw ba lada ym don thied na dukan jong ki haba ym don shuh ki kali ban ïaid ki hap ban leit bylla sngi noh. Tangba ki don pat kiba shong dukan kiba la pynpaw ba kin shong beit lada ym don shuh ba ïaid namar ki la im jakpoh da kane ka kam.
Wat la ka sorkar kam pat buh ïa ka tarik ban khang ïaid kali na ka jingkieng Umïam, hynrei ki nongñiah kali kamai na Nongsder, Umïam ki la pynpaw mynta lada ki ïaid na jingkieng Umïam ka bai kali ka long tang 50 tyngka ha ka jingjngai ba tang 20 minit eiei lada ym don jingdheng kali. Pynban lada ïaid na Umroi ka bai kali ki hap ban pynkiew haduh 150 tyngka namar ka la jngai bun shah.
Kine nongshong die dukan harud surok ki la ïathuh ba naduh ba la phah ïaid tang shiliang ka surok ha jingkieng Umïam ka la ktah shikatdei ïa ka bylla jong ki namar ki la duna kiba ïeng ban thied jingthied namar lah duna ki kali kiba kiew bad kiba hiar.
Nalor nangta, ki la ïathuh ruh ba ki kali kiba ju ïeng ban thied jingthied ki kham bun kiba kiew na Ribhoi sha Shillong namar ka dei ka liang sha kadiang bad ka kham suk lada ki shu pan haba ki shong hapoh kali.
Ka jingktah ka long ruh ïa kiba ñiah Auto Rickshow kiba ap briew na Umïam ban leit buh sha Nongsder bad ki karkhana ot dieng kin nym ïoh kamai shuh lada ym shah shuh ban ïaid ki kali na jingkieng Umïam.
Ka jingthmu ka sorkar ban nym shah shuh ban ïaid kali shipor ïa kiba leit kiba wan na Shillong sha Ribhoi shaduh Assam namar la donkam ban maramot kyrkieh ïa ka jingkieng Umïam bad yn pynïaid noh ïa ki kali najan ka kad liengsuiñ kaba don ha Umroi ban kiew sha Umrynjah, Mawtawar.
