Shillong, Rymphang 01
Ka Hynñiewtrep Border Disputes Redressal Forum (HBDRF) ha ka Sngi Palei ka la ong ba lada ka Sorkar Jylla ka dei ban shimkhia ban ïakren bad ka Sorkar Assam ban dawa ba ka dei ban pynphai noh ïa ka Block-I sha Meghalaya.
“Lada ka Assam ka kyntait ban pynphai ïa ka Block-I sha Meghalaya, na ka liang jong ka Sorkar Jylla ruh kam dei shuh ban ïasoi ïa kano-kano ka soskular bad ka Sorkar Assam,” la ong u Chairman ka HBDRF u Bah C Sungoh.
Ha ka Sngi Palei ka HBDRF ka la leit ban aiti ïa ka shithi sha u Myntri Rangbah ka jylla u Conrad K Sangma bad kumjuh sha u Symbud Myntri Rangbah ba khmih ïa ka tnat Pynroi Sor u Bah Sniawbhalang Dhar uba long ruh u Chairman ka Regional Committee ka West Jaiñtia Hills ban pynkynmaw ha kaba ïadei bad ka kam khappud ha Block-I.
U Bah Sungoh u la ong, ka Forum ka ai jingmut ruh ba ka Regional Committee kam dei ban pynkut ïa ka jingleit jurip tang ha ka thaiñ Khanduli, Mukroh bad Psiar jong ka Meghalaya bad sha Hamren Jrikyndeng ba don sha ka liang ka Assam hynrei ban buddien ruh ïa ka kaiphod jingjurip lang jong ki District Council ha u snem 1958.
U Bah Sungoh u ong ruh ba ka Forum ka dawa ba ïa ka kaiphod jong ka Regional Committee dei ban wanrah hapoh ka ïingdorbar thawaiñ ka Jylla ban ïatai.
Nalor nangta, u la ong ruh ba ka Forum ka dawa na ka Sorkar Jylla ba baroh 36 tylli ki shnong Pnar kiba don ha Block-I ki dei ban don beit hapoh Meghalaya bad kiwei pat ki shnong ba shong ki Karbi ki mat ïahap sha Assam, bad kane kan ïahap ruh bad kata ka ‘give and take’ policy ka sorkar.
U la pyntip ba ha u bnai Risaw 2023, ka Forum ka la pynlong ïa ka jingïalang bad ki Khlieh Nongsynshar lem bad ki nongïalam seng ha kaba la mynjur ban pyrshah ïa ka jingpynbna ba pynmih ha ka 13 tarik Ïaïong, 1951 namar ïa kane ka jingpynbna la pynmih khlem ka jingpynsngap paidbah ne ‘public hearing’ bad khlem ka jingtip ne jingbit jong ki nongshong shnong jong ki shnong ka Labang Nongphyllut Dalloiship (Block-I) bad u Dalloi ka Elaka Raloang, Elaka Chilliangmyntang bad Elaka Nongjngi.
U Bah Sungoh u ong ba ïa kane ka jingpynbna la pynmih bakla da ka Sorkar Assam kaba pynïaphiah jubor ïa ka Nongphyllut Dalloiship (Block-I) na ka Jowai Civil Sub Division bad ban pynrung sha ka United Cachar & Mikir Hills ha ka jaka ban pynneh hapoh ka United Khasi & Jaiñtia Hills District Councils jong ka Jylla Meghalaya.
