Shillong, Rymphang:
Ka Khasi Hills Autonomous District Council (KHADC) ha ryngkat ka jingïatreilang bad ka tnat Meghalaya Basin Development Agency (MBDA) ka Sorkar Jylla, ha ka Sngi Balang ka la lum ïa ka jingïalang ban ïakren halor ka mat jong ka jingdonkam ban pynneh pynsah ïa ka jingjyrngam jong ki khlaw ki btap lyngba ka prokram ‘Green Economy Meghalaya’.
Ka jinglum ïa kane ka jingïalang ka long ban ïakren ban wad ïa ki lad ki lynti kumno ban lah ban pynneh-pynsah ïa ki khlaw ki btap ban ïoh ïa ka lyer kaba khuid kaba suba bad ban ai jingmyntoi na ka bynta ki nongrep kiba lah ban ïada ïa ka mariang.
Hadien ba la wai ka jingïalang, haba kren sha ki lad pathai khubor, u CEM ka KHADC u Bah Pynïaid Sing Syiem u la ong, ba ka jingpynïaid shakhmat ïa ka prokram ‘Green Economy Meghalaya’ kan long ha ryngkat ka jingïatreilang bad ka Rabo Bank Acorn bad ka Iora Ecological Pvt Ltd kiba na Delhi.
U CEM u la ong, ba ka jinglum ïa kane ka jingïalang ka dei ban ïakren halor ka projek ‘Green Economy Meghalaya’ kaba long ka jingthmu ban pynneh- pynsah ïa ki khlaw ki btap da kaba kan ai jingïarap sha ki nongrep kiba thung dieng, kynthup ïa ki dieng ‘latyrpad, ki dieng sohmrit, ki dieng kwai bad kiwei kiwei.
Shuh shuh u la ong, ba nalor kane ka KHADC kan ai ruh ka jingïarap sha ki khlaw kyntang, ki khlaw jong ki Hima, ki khlaw kur.
U Bah Pynïaid u la ïathuh ba ka la don ki aiñ jong ka Sorkar Pdeng bad Sorkar Jylla ban ïada ïa ki khlaw ki btap bad ka Sorkar Jylla lyngba ka ‘Green Economy Meghalaya’ kan ïarap ïa ki nongrep kiba ïarap ban pynneh-pynsah ïa ki khlaw da kaba ai da ka jingïarap pisa hapoh kane ka projek.”
U la ong ba haduh mynta ki la don haduh 28 ngut ki nongrep kiba la dep ban pynrung kyrteng ïalade bad u la kyntu ruh ïa kiwei ki nongrep ban bud nuksa bad ba kin wan shakhmat ban shim ïa ka sienjam ban sumar sukher ïa ki khlaw ki btap.
