Shillong, Rymphang 01
Wat la ka Khasi Hills Autonomous District Council (KHADC) ka la dep pynlut haduh T.6 klur duna ban shna ïa ki ïing ban tei ïa ka Khasi Traditional Medicine Institute ha Lum Sohpet-bneng, Ribhoi District kaba jngai tang 4 km na surokbah (four lane) hynrei mynta kitei ki jingtei ki la shu kylla ïing jah bad sop phlang lut.
Kitei ki ïing ba la shna da ki dewbilat ki don kumba san tylli bad kawei ka dei kaba kham heh. Baroh kine ki jingtei kiba la dep lut ki la shah tap ha ki phlang bad kylla ïing jah.
Katkum ka jingïathuh u CEM bathymmai ka KHADC, Bah Pynïaid Sing Syiem haba ïakren bad ki nongthoh khubor ha u snem 2023 hadien ba u la shimti na u Bah Titos Chyne, u la ïathuh ba la tei ïa katei ka jaka sumar kynbat Khasi ha ka jinglut kaba T.5.77 klur ba la bei tyngka na ka Sorkar India hynrei haduh mynta ym shym la lah ban pyntreikam.
Ki khubor ki ïathuh ba ka jingslem ka KHADC ban plie ïa katei ka jaka sumar dawai kynbat Khasi ka dei namar bym pat biang ka surok, ka um, ka bording bad kynroh.
Ha ka jingleit jurip u nonglum khubor la lap ba ka surok dewbilat la dep shna hapoh ka phyllaw jong kane ka jaka sumar, ka kynroh hajan surok la dep katba shadien ym pat sdang, ka bording bad ka um ym pat tip la ki la dep ne em ban pyndait namar la dep khang tala ïa ki jingkhang.
Kaba sngewbynnud ban ïohi ïa kane ka jaka sumar dawai kynbat Khasi ka dei namar ki kamra kiba la dep shna itynnad lut naduh ki jingkhang bah bad ki jingkhang ïit ba la dep pyndait da ki ïing hynrei mynta la sop da ki phlang.
Ha ka jingjurip la lap ba kane ka ïing kaba la dep shna pynitynnad bha bad pynlut palat T.6 klur hynrei ka KHADC ka shu ieh ïing jah namar ym don nongap pahara.
Katkum ki khubor ba la ïoh lum ym dei tang T.5.77 klur ba la pynlut hynrei ka KHADC ka dang mang pisa shuh shuh ban kot haduh T.7.77 klur ban pyndep lut ïa kane ka jaka sumar hynrei haduh mynta haba la dep pynlut ka dang sah khongreng.
Ka jingshna ka KHADC ïa ka Khasi Traditional Medicine Institute ha Lum Sohpetbneng ka dei hadien ba ka la mynjur ïa ka KHAD (Protection and Promotion of Khasi Traditional Medicine) Act, 2011 ban pynneh pynsah ïa ka rukom sumar ai dawai kynbat ki Khasi kiba pyndonkam ha ki por mynshwa.
