Shillong, Rymphang 01
U Lamphang ka ïingdorbar thawaiñ ka jylla, u Thomas A Sangma, u la pynpaw ïa ka jingbym sngewhun satia halor ka jingïaid jong ka kam ba pyntrei ïa ka ïingdorbar ba thymmai ka Jylla ha Mawdiangdiang namar ba ka suki bha.
“Nga la leit ban jurip da lade ha ka Sngi Palei bad ngam hun satia bad ka jingïaid jong ka kam kaba la suki bha,” la ong u Lamphang haba kren sha ki lad pathai khubor ha ka Sngi Palei.
“Wat la kam don ka jingsngewhun halor ka jingïaid ka kam, nga don pat ka jingkyrmen kaba skhem ba ïa kane ka ïingdorbar ba thymmai yn lah ban pyndep noh ha ka por kaba la buh, kata ha u Nailar, 2024,” u la ong.
U Lamphang u la ong, “Nga la bthah ba kin pynsted noh wut-wut ïa ka kam. Katkum ka jingtip, ka jingslem ka dei namar ka jingbym poi jong ki tiar ki tar ha ka por ba biang. Baroh phi ïa tip ba ka jaka ba shna ïa ka main hall bad central hall, yn pynïeng da ka tnum pyllum ‘dome’ kaba la shna da ki pre-fabricated steel, kumta ka mar ka slem ban poi shane khamtam lei ba ki surok jong ngi, kim long kiba biang ban kit khia palat bad kumta ka shimpor, hynrei wat la katta ruh haduh kumba 50% na ki tiar kila dep wan poi, ïa kaba kin lah pat ban sdang ïa ka kam.”
U Thomas u pyntip ba ka kam ka la jan dep artad hynrei ka dei tang ka Central Hall kaba dang sah bad ka kam kumba ka long mynta ka la ïaid haduh 90 persen.
“La kular ïa nga ba ka jingtei ïa ka Central hall kan dep noh hapoh u bnai Lber. Nga la shimkhia bha ïa ka kam, kumta nga la leit ban jurip manla ka por sha kane ka jaka ban pynthikna ba ka kam kan ym shim por,” ong u Lamphang.
