Shillong, Rymphang 01
U Nongïalam ka Liang Pyrshah jong ka ïingdorbar thawaiñ ka jylla u Bah Ronnie V Lyngdoh, ha ka Sngi Palei u la pyntip ba un sa thoh shithi sha baroh ki seng saiñ pyrthei kiba don ha ka Liang Pyrshah ban ïakynduh lang shwa ban sdang ka dorbar mang tyngka ha ka 16 tarik mynta u bnai.
Haba kren sha ki lad pathai khubor, u Bah Ronnie V Lyngdoh uba dei ruh u MLA ka Congress na Mylliem u la ong, “Lada ki mynjur ban ïakynduh, ngin sa rah ïa ki mat kiba ktah ïa ki paid nongshong shnong ryngkat bad ban pynlong ïa ka, kawei ka mat na ka bynta ki nongshong shnong.”
Kum ban shu pynkynmaw hapoh ka ïingdorbar ki don haduh lai tylli ki seng saiñ pyrthei kiba don ha ka Liang Pyrshah kiba kynthup ïa ka Congress, Trinamool Congress (TMC) bad ka Voice of the People Party (VPP).
Une u Nongïalam ka Liang Pyrshah u la ong ruh ba ka Congress Legislature Party (CLP) ka la don ïa ka jingïakynduh ha ka Sngi Palei bad ruh ha kine ki ar ne lai sngi ban wan, kan sa ïakynduh biang ban ïakren bad ïatai halor ki mat ban wanrah hapoh ka dorbar mang tyngka.
