Shillong, Rymphang 01
Ka BJP ST Morcha kaba dei kawei na ki tnat treikam jong ka BJP ha kane ka jylla bad kaba khmih ïa ka bha ka miat jong ki paid riewlum, ka la pynlong ïa ka jingïalang pynithuh nongkitkam ha ka 31 tarik u Kyllalyngkot ha nongbah Shillong.
U President jong kane ka tnat u Thomas Marak u la ong ba ka BJP ka pyntreikam ïa ki mat thymmai kum ka ‘Vocal for Local’ kaba pynshlur ba dei ban pynkiew ïa ki jong lajong bad ba ka prokram thymmai kaba ki hap ban pyndep kum ka tnat seng ka dei ka ‘Gaon Chalo Abhiyan’ ne ka prokram ba dei ban leit sha kut ki nongkyndong baroh kawei ha ka jylla Meghalaya.
Ha kane ka prokram la ïadon ryngkat lang u State President ka BJP u Rikman Momin uba la pdiang burom ïa ki nongkitkam thymmai bad ïa ki district president bad ki komiti jong ki.
U Rikman u la kyntu ïa ki nongkitkam ka ST Morcha ba kin trei met bad mynsiem ban pynkhlaiñ ïa ka BJP bad ban peit sani ïa ka jingbha jingmiat jong ki paid riewlum wat la bun, hynrei donkam ban nangkiew ban ïa aireng bad kiwei ki bym dei riewlum. U la ong ba ka ST Morcha kan sa shimkhia ban ïarap ïa ki trai ri ha ki jaka nongkyndong lyngba ki skhim bapher bapher jong ka sorkar kmie.
Ki nongkitkam baroh jong ka ST Morcha da kawei ka sur ki la shim smai ba kin trei borbah ban leit pynsngewthuh paidbah kumno ba ki jingmyntoi ki wan sha ka jylla hapoh ka jingïalam u Myntri Rangbahduh u Narendra Modi.
