Shillong, Rymphang 02
Namar ka jingmih ki shlem ai khubor ki bym ithuh ithaw lyngba ka rynsan ‘YouTube’, bad ka jingbun ki khubor hamsaïa, na ka liang jong uwei u nongshong shnong ka jylla ïa uba la tip kyrteng kum u Bah Joannes JTL Lamare, u la phah da ka shithi sha u Symbud Myntri Rangbah, Bah Prestone Tynsong, uba bat ruh ïa ka tnat pulit, ban kyrpad ïa u ban teh lakam ïa ka jingmih jong kine ki shlem lyngba ka ‘YouTube’ kiba khlem bud ïa ki kyndon.
Ha ka shithi ba la phah sha u Bah Prestone, la ong ba kum u nongshong shnong ka jylla, u Bah Joannes u kwah ban kyrpad ïa u Symbud Myntri Rangbah bad ïa ka tnat ba dei khmih ba ka dei ban shim ïa ki sienjam ban tehlakam ïa ka jingmih ki shlem lyngba ka ‘YouTube’ kiba pyni ïa ki khubor, hynrei kiba khlem da ïoh jingithuh bad kiba long be-aiñ.
U la ong ba ka daw ba donkam ban peitngor ka long ba ki don kiba pynmih ïa ki dur khih (video) ha ka nam bad kyrteng jong ki khubor.
Shuh shuh, u la thoh ruh ba ka ‘YouTube’ ka don ïa ki kyndon ba hap ban bud shwa ban pyllait ïa kino-kino ki dur khih.
Namarkata, halor kane, u Bah Joannes u la ai jingmut ïa ka sorkar Meghalaya ban peit bniah ïa ka jingmih ki shlem ai khubor lyngba ka ‘YouTube’ hapoh ka jylla bad ban tehlakam ïa kito kiba khlem bud ïa ki kyndon.
