Shillong, Rymphang:
Ka Toyota Kirloskar Motor (TKM) ka la pynkhreh ban ïashim bynta ha ka Bharat Mobility Global Expo 2024, kaba long ka lympung ban pyninam ïa ki tiar ki tar bad ki kor ki bor teknologi kiba katkum ka juk mynta bad ïa kiba la shna na ka bynta ban pynduna ïa ka jingktah ïa ka mariang bad kiba long ruh ki tiar ki tar bad ki kor ki bor kiba pynmih bad kiba long ruh kiba la shna hapoh kane ka ri. Ka rynsan ba la pynïeng da ka kompani kan pyni ïa bun tylli ki kor ki bor teknology ba la pyndonkam ha kaban shna ïa ki kali kynthup naduh ki Battery Electric bad ki kali elektrik kiba khlaiñ ne ki Strong Hybrid Electric Vehicles, yn pyni ruh ïa ki kali Fuel-Cell Electric Vehicles, ki Electrified Flexi Fuel Vehicles, bad ki kali ba pyndonkam da ka CNG. Ha kane ka lympung yn pyni ruh ïa ki kali Emergency Response Vehicle, kiba long ki kali ba la shna na ka bynta ban ai jingshakri haba donkam kyrkieh ha ka imlang sahlang bad ha kane ka ri.
Ka lympung pyninam ba la tip kum ka Bharat Mobility Global Expo 2024 kadei ka lympung kaba nyngkong eh ban pyninam ïa ki kali, da kaba wanrah lang hapoh kawei ka lympung ïa ka jingpyninam ïa baroh ki tiar ki tar ki kor ki bor kiba donkam na ka bynta ban shna kali. Ha kane ka lympung pyninam yn pyni ïa ki teknologi ki bym ktah ïa ka mariang, yn pyni ïa jingtei kiba donkam, yn pyninam ruh ïa ki lad ki lynti ki ban ai jingïarap ha kaba ïadei bad ki kali, ka jinglah ban pynïasoh ïa ki jaka da ki kali, bad ïa ka bor ka jinglah ban shna bad pynmih kali, ha kaba yn pyni ba ka India ka la long ka ri kaba la paw ban long kum kawei na ki jaka shna ïa ki kali kiba don ki kor ki bor ka juk mynta bad ki bym ktah ïa ka mariang. Kane ka lympung ka ai ruh ïa ka rynsan kaba paka ban batai shaphang ka jingkiew jong ka India ha ka liang ka jingshna kali bad kaban wanrah ka jingkylla ïa ka lawei ha kaba ïadei bad ki kali ha India bad ha ka pyrthei.
U Vikram Gulati, Country Head bad Executive Vice President, ka Toyota Kirloskar Motor, haba pynpaw ïa ka jingkmen jong u shaphang ka jingïashim bynta jong ka kompani, u la ong, “Katba ngi dang pynkhreh na ka bynta ka lympung pyninam jong ka Bharat Mobility Global Expo 2024, ka Toyota Kirloskar Motor ka sngewkmen haduh katta katta ban ïoh ban ïadon bynta ha kane ka lympung.”
