Shillong, Rymphang 02
Ka Kynhun Myntri ka Sorkar Jylla ka la ai jingmynjur ïa kawei ka sienjam ban pyntreikam ïa ka prokram kaba kyrteng ka ‘Meghalaya Program for Adolescent Wellbeing Empowerment and Resilience (MPoWER)’ ha kaba yn pynleit jingmut bad phaikhmat sha ki khyllung haduh 9 snem ka rta, bad ïa kito kiba don ha ka rta ban khie samla bad peit thuh ruh ïa ka sap bad jingsngewtynnad kaba don ha ki.
Kane ka sienjam ka dei kaba kham kyrpang na ka bynta ki khyllung bad kiba khie samla ha kaba yn phaikhmat haba ïadei bad ka koit ka khiah naduh ka bor met, ka bor pyrkhat haduh ba kin da dap 9 snem ka rta, bad ynda ki la tam ïa ka 9 snem hap peit thuh sa ïa ki jinghikai pyntbit bad kaei ka sap bad jingsngewtynnad kaba don ha ki khnang ban ai jinghikai pyntbit ruh ïa ki.
Kumta khnang ban pyntreikam ïa kane ka sienjam, ka Kynhun Myntri ka la ai jingmynjur ïa ka ‘Human Development Council’ kaba khlieh da u Myntri Rangbah katba u Chief Secretary pat un long u Chairman jong ka Project Steering Committee. Nalor kane, ki Deputy Commissioner ha man la ki district kin khlieh ïa ki Executive Committee ban pyntreikam ïa kane ka prokram.
Shuh shuh ka Kynhun Myntri ka la ai jingmynjur ruh ban pynkylla ïa ka Meghalaya Telecom Infrastructure Policy (MTIP) hadien ba ka Sorkar Pdeng ka wanrah katto katne ki jingpynkylla hapoh ka kyndon.
La mynjur ruh ïa kawei ka kyndon hapoh ka tnat Khlaw kaba kyrteng ka Meghalaya Forest Sub ordinate Technical Service Rules.
