Nongpoh, Rymphang:
U Myntri Rangbah ka jylla, u Conrad K Sangma ha ka Sngi Palei u la pyllait paidbah bad aiti ïa 207 tylli ki kali kit ñiut ilektrik lane kita ki e-vehicle jong ka Swachh Bharat Mission (Grameen) sha ki block bapher bapher jong ka Ri Lum Khasi Jaiñtia, ha ka jingïalang kaba la pynlong ha Lumdaitkhla, Bhoirymbong, Ri Bhoi District.
Ha kane ka sngi la wan ban ïadon ryngkat ruh da u Symbud Myntri Rangbah ka jylla, u Bah Sniawbhalang Dhar, u Myntri ka tnat PHE u Marcuise N Marak, ka Myntri ka tnat ka koit ka khiah ka Kong Ampareen Lyngdoh, u MLA ka Umroi Bah Damanbait Lamare, ki heh ophisar sorkar na ka tnat PHE bad Shillong Municipal Board, ki nongïalam shnong bad kiwei kiwei.
Haba ai jingkren ha kane ka sngi, u Conrad K Sangma u la ong ba ka jingaiti ïa kine ki kali bording ilektrik ki ban kit ïa ki ñiut bad jaboh na ki shnong ki thaw ka dei kawei na ki sienjam ban wanrah ïa ka jingïatreilang hapdeng ka sorkar bad ka imlang ka sahlang, ki shong ki thaw bad ba dei lyngba ka jingïatrei lang ryngkat-ryngkat kaba lah ban wanrah ïa ka jingkylla ha ka shnong ka thaw.
U la ong, “Ka jinglehkhuid ka dei ka rukom jong ka jaidbynriew bad ha ka jingïaid lynti, ngi la kum klet bad ïa kane ka bynta kaba kongsan bad ka por ka la dei ba ngin pynthymmai bad pynim biang ïa kane ka bynta kaba la ïalam da ki ‘riew tymmen bad khamtam ban pynrung ha ka pyrkhat pyrdaiñ jong ki khun samla halor ka jingkongsan ban lehkhuid leh suba ha ka imlang ka sahlang.”
U Myntri ka tnat PHE u Marcuise N Marak ha ka jingkren u la ong, ka jingaiti ïa kine ki kali bording ilektrik ka dei ka sienjam kaba kongsan ba ka sorkar jylla ka buh thong ban pynurlong ïa ka jingthmu ban pynlong ïa ka jylla kaba khuid kaba suba.
U la pyntip ruh ba ka sorkar jylla ha kine ki ar snem, kata ha u 2024 bad 2025, ka don ïa ka thong ban pyndep 100% ODF Plus, ban shna ïa kumba 110240 tylli ki jaka leit shabar, 570 tylli ki Community Sanitary Complex Units, 18 tylli ki Feval Sludge Management nalor ka Govardhan Units bad Plastic Waste Management Units ki ban sa shna ha kylleng ka jylla.
Shuh shuh u la pyntip ruh ba kum kane kajuh ka jaid prokram yn pynlong ruh ha Ri Lum Garo na ka bynta ban aiti ïa kine ki kali kit ñiut ilektrik sha ki block bapher bapher kiba hap ha ka thaiñ Garo.
