Mairang, Rymphang 02
Ka shlem treikam u Deputy Commissioner, Eastern West Khasi Hills District, ha ryngkat ka jingïatreilang bad kiwei ki tnad Sorkar, ki Rangbah Shnong, ki shnong jong ka thaiñ Mairang bad kiwei pat kiba ju ïadon bynta lang, ha ka 2 tarik u Rymphang, 2024 ki la pynlong ïa ka jingpyn-khuid ïa ka Wah Ummawleiñ.
Katei ka jingpyn-khuid kaba la long na Jingkieng Ummawleiñ ka dei shi bynta jong ka ‘International Water Conclave, 2024’.
La sdang ïa kane ka jingpynkhuid ïa ka Wah Ummawleiñ ha ka por 9 baje mynstep ha kaba la ïohi ïa ka jingïashim bynta shitrhem jong baroh naduh ki ophisar Sorkar, ki nongtrei Sorkar, ki ‘riewtymmen bad ki samla samhoi jong ka thaiñ Mairang.
Shuh shuh ka jingthmu jong kane ka prokram ka long ban wanrah ïa ka jinghikai sha baroh ki nongshong shnong ba kim dei ban pynjaboh ïa ki tyllong um namar ki dei ki thied jingim jong baroh ki jingthaw kiba im ha sla pyrthei, ki briew baroh ki dei ban don ka jingkitkhlieh halor kane.
U Deputy Commissioner ka Eastern West Khasi Hills District, Bah G. Kharmawphlang, IAS, u la kyntu bad wer ïa baroh ban ym pynjaboh ïa ki tyllong wah.
