Shillong, Rymphang 02
U Symbud Myntri Rangbah, u Bah Prestone Tynsong u la pyntip ba ka projek shna surok kaba kyrteng ka Western Bypass kan sa urlong bad u la ïathuh ba ki trai jaka kiba ka jaka jong ki ka hap ha Ri Bhoi bad East Khasi Hills district ki la mynjur ban pdiang ïa ka dor kaba ïa biang lang lyngba ka jingpynbeit bad ki bor district na baroh ar tylli ki district.
Haba ki nongthoh khubor ki buh jingkylli haba ïadei bad kane ka projek kaba kongsan bha kaba ïarap ruh ban pynduna ïa ka dheng kali ha Shillong, u Bah Tynsong u la pynpaw ka jingkmen ba kane ka projek kan urlong namarba ki trai jaka kiba don jaka ha baroh ar tylli ki district (Ri-Bhoi bad East Khasi Hills) ki kloi ban pdiang ïa ka dor kaba la pynbeit da ka Sorkar lyngba ki bor district.
U la ong ba kham mynshwa, ha ka jingïalang ha Guwahati, u Myntri ka Sorkar Pdeng uba peit ïa ka tnat Road Transport and Highways, u Nitin Gadkari u la pynpaw ka jingeh ban mang pisa ïa ka Western Bypass namarba ka bai jaka ka la rem palat.
Kumta u la ong ba lada dei ba ym lah ban pynhiar ïa ka dor jong ka jaka, ka Sorkar Pdeng kan nym mynjur ïa kane ka projek namarba ka jinglut ban shim jaka ka poi kumba T.1,200 klur katba ka jingmang pisa na ka bynta ka projek ka long tang kumba T.650 klur.
U Symbud Myntri Rangbah u la ïathuh ba hadien ka jingpynbeit biang bad ki bor district bad ki trai kiba don jaka ha East Khasi Hills bad Ri Bhoi, la pynbeit ïa ka dor kaba mynjur lang bad kane ka dor ban shim jaka ka la hiar jan mar shiteng na kaba mynshwa.
Ka Western Bypass ka dei ka surok kaba sdang na Umsaw Khwan ha Ri Bhoi district bad kan ïaid lyngba ki shnong ha East Khasi Hills district ban poi sha thaiñ Mawmaram hajan Sohïong.
