Shillong, Rymphang:
Ka North East Small Finance Bank (NESFB) ka sngewtynnad ban pynbna ba la thung ïa u Shrimohan Yadav kum u Independent Director sha ka Board jong ka. U Yadav, u dei u briew uba la tbit bha ïa ka kam bad u la trei la 36 snem ha ki kam kiba ïadei bad ki bank, u la trei ruh haduh 29 snem ha Reserve Bank of India (RBI), bad da ka jingdon jong u shibun ki jingtip bad jingsngewthuh la lah ban wanrah sha ka NESFB.
Ha ka por ba u dang trei ha RBI, u Yadav u la noh synñiang shibun bha ha ki kam bapher bapher kiba u la bat, ba kynthup ïa ka kam Chief General Manager jong ka tnad Department of Regulation. Ka jingtbit jong u ka long kaba ïar bha kaba kynthup naduh ka jingtbit jong u ban pynïaid kam ne Supervision, ban thaw ïa ki kyndon treikam ne Regulation, ban kyntiew ïa ki kam ha ki jaka nongkyndong ne Rural Development, ka jingwanrah ïa ki jingshakri ban don ka jingkynthup lang ïa baroh ha ki kam kiba ïadei bad ka pisa tyngka ne Financial Inclusion, bad ban peit ïa ka bha ka miat jong ki nongtrei ne ka Human Resources Management. U Yadav u don ka bynta kaba kongsan bha ha bun na ki sienjam treikam, kynthup naduh ka jinglong trai bad ka jingithuh ïa ki bank jong ki briew shimet, ka jingpynïasoh ia ka jingtreikam jong ki bank kawei bad kawei bad kumjuh ruh ka jingshimti bad long trai noh kawei ka bank ïa kawei pat, ka jingpynbha ïa ki bank kiba tlot, bad kumjuh ruh ha ki kam kiba ïadei bad ka jingsynshar. U la long uba ïadon bynta ban lam khmat ha ki jingïakren bad ka sorkar India ban pynkylla bank shimet bad ban leh ïa ki kam kiba la tip kum ki Divestment ne ban die ïa ki jingdon jingem ha ki bank ba la pynïaid da ka sorkar khnang ban ïoh ïa kiwei pat ki jingïoh nong.
Ha shwa ba un trei ha RBI, u Yadav u la trei shwa 7 snem bad kawei na ki bank jong ka sorkar ne ka Public Sector Bank, da kaba phai khmat sha ka jingairam bad ka jingbei tyngka.
Ka jingthung ïa u Yadav sha ka Board jong ka NESFB ka dei kawei na ki sienjam treikam bala shim na ka bynta ban nang pynkhlaiñ shuh shuh ïa bank. Ka jingdon jong u ïa ka jingsngewthuh bad ka jingtbit ha ki kam kiba ïadei bad ki bank bad kumjuh ruh ha ki bynta kiba ïadei bad ka bei tyngka ki long kiba kongsan haduh katta katta na ka bynta ka NESFB ha ka jingïaid lynti jong ka ha ka kam ban nang lah shuh shuh ban kiew bad ai jingshakri sha ki briew.
U Satish Kumar Kalra, Interim MD & CEO, NESFB, u ong, “Ka jingtreikam jong ngi ka long ka jingïai bteng ban nang pynkhlaiñ shuh shuh ïa ka jingtreikam jong ka bank ha ka liang jong ka jinglah ban lam khmat da kaba ban ruh halor ka jingbit jingbiang ha ka rukom pynïaid bad ka jingtrei minot. Ka jingthung ïa u Yadav kum u Independent Director sha ka Board jong ka NESFB ka long ka jingleh kaba biang bha ha kane ka phang. Khlem artatien ka jingtbit bad ka jingshemphang jong u ka long kongsan haduh katta katta na ka bynta kan nang kham lah shuh shuh ban btin lynti ha ka liang ki kam jong ka bank bad wanrah ïa ka jingkiew kaba ïaineh bad kaba bit ba biang..”
Haba phai ha ka liang ka jingthungkam, u Shrimohan Yadav, Independent Director, NESFB, u la bynrap, “Ha baroh shi lynter jong ka jingtreikam jong nga, nga la long uba donbok ban ïoh ban ïadon bynta ha kiba bun ki sienjam treikam kiba wanrah ïa ki jingkylla la ka long ha ki bank jong ka sorkar bad ha ki bank ba pynïaid da ki riew shimet. Mynta, ka NESFB ka don ha ka bynta kaba kyrpang bad kaba kongsan bha, bad ka long kaba kham pher bad kaba ngam pat ju ïakynduh kum kane kaei kaei ha ka jingïaid lynti jong nga ha ka kam..
Ka jingtreikam jong ka bank ka long kaba pher bha bad ka long ka bank kaba wanrah ïa ki sienjam treikam ban wanrah jingkylla ha ki kam bank naduh na trai, bad kaba phai khmat bha ruh ha ka liang ban don ka jingkynthup lang ïa baroh ha kaba ïadei bad ka jingpynïaid ïa ka pisa pilaiñ bad kumjuh ruh khnang ba baroh kin ïoh ban ïadon bynta. Da ka jingwan jong ka jingïasnoh lang bad ka Slice, ka NESFB ka la long kaba la pynkhreh ban sdang noh ïa ka sienjam treikam da kaba leh ïa ka Digital. Nga sngew kmen ban ïoh ban noh synñiang sha kane ka kam bad ban ïadon bynta ha ka jingïaid lynti jong ka NESFB ban thaw ïa ki lad ki lynti jong kine ki buit treikam thymmai kiba biang ba bit na ka bynta ki kam kiba ïadei bad ki bank.”
