Shillong, Rymphang 02
Ka Voice of the People Party (VPP) ka la kren shai ba ka seng kan ym ïadon bynta ha ka Dorbar Mang Tyngka ka ban wan lada u Lat ka Jylla, u Phagu Chauhan um kren da ka ktien Phareng ne lada ka Assembly Secretariat kam lah ban pynbiang ïa u nongpynkylla ktien ha ka por ba kren u Lat.
“Katba ngi dang pynkhreh na bynta ka Dorbar Mang Tyngka jong ka ïingdorbar thawaiñ ka ban wan, nga thoh ban pynsngew ïa ka mat ba donkam haba ïadei bad ka ktien ka ban pyndonkam ban kren ha kane ka dorbar,” la ong u Secretary ka VPP Parliamentary Party, Bah Heavingstone Kharpran ha ka shithi ba la phah sha u Lamphang ka ïingdorbar thawaiñ ka Jylla, u Thomas A. Sangma.
U Bah Kharpran u la ban jur ba da kaba buh jingmut ïa ka jinglong kyrpang jong ka Dorbar Mang Tyngka bad ki jingktah ïa ki nongshong shnong jong ki konstitwensi, ka long kaba donkam ba baroh ki dkhot jong ka ïingdorbar ki lah ban sngewthuh shai bad ïadon bynta bad ki jingpynïaid kam hapoh ïingdorbar.
“Hynrei, kumba la sakhi ha ki Dorbar ba la dep, u Lat u la ai jingkren da ka ktien ‘Hindi’ hapoh ïingdorbar, ha kawei ka liang kaba la buh jingeh ïa ki dkhot ki bym sngewthuh ïa ka ktien ‘Hindi’ bad da kaba buh jingmut ba ka ‘Hindi’ kam dei ka ‘Official Language’ jong ka Meghalaya,” u la ong.
Halor katei ka bynta, u Secretary u la ong ruh ba ka jingïalang jong ka Parliamentary Party ka VPP kaba la long ha ka 30 tarik Kyllalyngkot mynta u snem, ka la rai ban kyrpad ïa u Lamphang ba ka jingkren jong u Lat ka dei ban long ha ka ktien Phareng.
Ha kajuh ka por, u la ong ba lada u Lat ka Jylla u shem jingeh ban kren sha ka ïingdorbar ha ka ktien Phareng, kata, ka ophis u Lamphang ka lah ban pynbiang ïa u nongpynkylla ktien ha ka por ba u Lat u ai jingkren na bynta ka jingbit jingbiang jong baroh lang.
Shuh shuh u la bynrap ba da kaba pyntikna ba ki jingpynïaid kam haba ïadei bad ka Dorbar Mang Tyngka kin long ha ka ktien kaba ïa sngewthuh lang da baroh ki dkhot, yn lah ban pynneh ïa ki nongrim jong ka khuid ka suba, ka jingkynthup lang bad ka jingsynshar kaba jop.
“Ka seng ka kwah ban kdew shai ba kan ym ïadon bynta ha ki jingpynïaid kam lada ka Assembly Secretariat kam lah ban pynbeit ïa kane ka kam,” la ong u Bah Kharpran.
Kum ban shu pynkynmaw, ha u snem ba la dep, baroh 4 ngut ki MLA ka VPP ki la mih noh napoh ïingdorbar kum ka dak ka jingpyrshah halor ka jingkren ‘Hindi’ u Lat ka Jylla.
