Shillong, Rymphang 04
Ka jingmaramot ïa ka Umïam Hydro Electric Dam ka dei kaba la bei da ka Sorkar Pdeng lyngba ka skhim Dam Rehabilitation and Improvement Project (DRIP) ha kaba ka Jylla ruh ka hap bei lang 20%.
Haba ïakren bad u Myntri ka tnat bording, u AT Mondal u la ïathuh kane ka skhim ka dei kaba wan na ka Sorkar Pdeng kum ka ‘Grant’ sha ka Jylla ha kaba ka rukom bei pisa hapdeng ka Sorkar Pdeng bad ka Jylla ka long 80 la 20.
U la ong ba ka Sorkar Pdeng ka don ka soskular bad ka World Bank ban pyntreikam ïa ka skhim DRIP na ka bynta ban pynbha ïa ki dam ha kylleng ki Jylla jong ka ri.
U la ong ba lada kheiñlang lut ïa baroh ki bynta jong ka Umïam dam kiba wan lang hapoh jong kane ka skhim, ka Sorkar Pdeng ka mang kumba T.215.45 klur, bad na kane, ka Sorkar Pdeng ka bei 80% katba ka Jylla ka hap bei 20%.
U la ïathuh ruh ba na ka 80%, ka don ruh kaba hap ha ka bynta jong ka ram (loan component) kumba 10%.
U Mondal u la ong ba ki Jylla kiba rit kum ka Meghalaya ki hap ha ka thup kum ki Jylla ba kham kyrpang (special category), bad dei na kane ka daw ba ka rukom bei pisa ka long 80:20 hapdeng ka Sorkar Pdeng bad ka Jylla haba ïadei bad ka skhim DRIP. Katba kiwei pat ki Jylla ki hap ha ka jingbeit pisa kaba long 70:30, hynrei ïa kiwei pat ki kompani ka Sorkar Pdeng kiba don ïa ki dam ka jingbei pisa ka long 50:50.
Ka jingthmu ba kongsan jong ka skhim DRIP ka long ban kham pynbha bad ai jingshngaiñ ïa ki dam kiba la don lypa bad donkam ruh kumno ban thaw lad ba ki dam kin kham lah ban treikam bad pynmih pisa khnang ba ka jingpynbha ïa ki dam kan long kaba kham neh slem.
