Shillong, Rymphang 04
U Pastor F. Syngkli uba peit ïa ka Mynnar Presbytery kaba hap ha ki thaiñ Jirang konstitwensi, Ribhoi District, u la ïathuh ba ha kane ka lyngkha trei ka jong u, ki mad shibun ki jingeh ha ki thaiñ khappud namar dang ha kine ki snem ka sorkar Assam ka wan thaw da ka ïing skul, Anganwadi ha syndah ka ïingmane.
Ïa kane ka jingeh kaba ka Balang ka ïakynduh u la pynpaw hashwa ba un sam ïa ka ktien jong U Blei ha ka jingïaseng kaba 1:30 nohphai sngi jong ka Jingïaseng Samla Shillong Sepngi Presbytery kaba la long ha Balang Presbyterian Lummawbah kaba hap ha KJP Provisional Synod Pdeng kaba la pynkut mynta ka Sngi U Blei ka 4 tarik Rymphang 2024 ha madan phutbol jong ka shnong Lummawbah.
U Pastor Syngkli um kwah ban ïathuhkhana jrong shaphang ka jingeh ha jingïalap ïa ka gospel u Jisu Khrist ha ki thaiñ khappud namar ka por ka lyngkot hynrei u la kyrpad ïa ki riewngeit ban buh ha ka jingduwai.
Haba sam ïa ka ktien jong U Blei sha kane ka jingïaseng, u Pastor u la sot na ka jingrwai u Solomon, ka lynnong kaba 4 bad ka dkhot kaba 9, kaba kren shaphang ki samla khristan bad kiba ngeit kiba la shah lute ha kane ka pyrthei.
Ka phangpdeng kaba u Pastor u la wanrah ha kane ka jingïaseng ka long, “Pha la lute ïa ka dohnud jong nga”.
U Pastor Syngkli u la ong haba ïohsngew ïa ki nonglute, ki dei kiba rah da ki tiar pynmynsaw ban tuh. Hynrei ha kane ka jingrwai u Solomon ka la ïapher namar ka nonglute ka dei ka kynthei kaba na Jerusalem kaba bhabriew kaba lute ïa ka dohnud jong u Solomon.
Kumta, u la kren pharshi ha kane ka juk kaba mynta ba wat ki shynrang ruh ki shah lute lada ïohi ïa ka kynthei kaba bhabriew.
Nalor nangta, u la ong ba u Solomon u jot ïa ka jingim namar u la ïoh jingstad na U Blei ban synshar ïa ka hima, hynrei u klet ban pan ban synshar ïa ka jingim lajong.
Namar kata, u la pynpaw ba ha kane ka juk kaba mynta ki khun ki mih na la ïing tang namar ki kmie ki kpa ki kum kren bakla, hynrei kim tip pat katno ka jingjynjar ki kmie ki kpa haba ki sumar ïa ki naduh dangrit.
Ha kane ka jingïaseng la pynrhem da ki sur jingrwai na ka Balang Presbyterian Lummawbah, Nongbsap, Umlyngka, Kreit, Delegate, Standing Choir Shillong Sepngi Presbytery bad Jingïaseng Khynnah Balang Lummawbah.
