Shillong, Rymphang 04
Ka jingjyllei ki kam tuh kam thiem hapoh ka jylla ka la long kaba shyrkhei haduh katta-katta ha kaba na ka por sha ka por la ïohsngew bad ïohi ba ki paidbah ki ju shah tuh ki tiar ki tar ne ki jingdon jingem na ïingsah lem bad jaka trei.
Kane ka jingshah tuh ka la jia ha ki shnong bad jaka bapher-bapher jong ka nongbah Shillong bad wat sha ki jaka nongkyndong ruh kumjuh.
La lap ba bunsien ïa ka jingshah tuh shah thiem jong ki paidbah la ïoh ban ring lyngba ki kor CCTV kiba la pyndait.
Lehse, kane ka jingjur ka jingshah tuh ka dei na ka daw ka jingjyllei eh jong u drok kaba la pynlong ïa kito kiba kyrni ha une u jait jingdih ba kin thom wat ïa ka sang ka ma tang ban ïoh thied bad ban ïoh dih ïa u drok, ki kloi ban leit tuh na kylleng-kylleng ki jaka.
Ka Motphran ha ka por mynsngi-mynshai ka long ka jaka kaba shngaiñ. Ynda la kem dum bad kynjah, katei ka jaka ka la long kaba ishyrkhei bad kaba ma ïa ki kynthei, ki khynnah ne ki rangbah ban ïaid lyngba na katei ka jaka namar la ïohi ba ki ju don ki khynnah kiba ju ïalum ïalang hajan ka jaka bret ñiut ba la buh da ka Shillong Municipal Board bad ha ki bynta kiba marjan jong kane ka jaka bret ñiut.
Na ka liang U Nongsaiñ Hima ha kaba ïadei bad kane ka bynta, u la leit ban ïakynduh dalade ïa katto-katne ngut ki Rangbah Shnong jong ki shnong kiba marjan bad ka Motphran namar ba kane ka jaka ka dei kawei na ki jaka kaba ki nongdie bad ki nongdih drok ki ju pynlong ïa kane ka jaka kum kata ka ktem ban leh ïa kum kine ki jait kam khamtam ha ka por mynmiet-mynïong. Na ka liang ki nongshong shnong kiba marjan bad ka Motphran ruh ki ju ud ju nam bha ha kine ki sngi ba ka jingshah tuh shah thiem ha kitei ki jaka ba marjan ka la jur shaba palat.
Haba ïoh ban ïakren bad u Rangbah Shnong ka Wahthapbru, u Bah Jopmiki Rymbai, u la ong ba ka jingshah tuh kam dei tang ha ki shnong kiba marjan bad ka Motphran hynrei ki jingshah tuh ki dei ha manla ki shnong ki thaw.
U Bah Rymbai u la ong ba ka jingsniew kaba jur bha ka dei ha katei jaka bret ñiut kaba don ha Motphran kaba la long kum ka jaka kaba la pynlang ïa ki jingsniew kiba har rukom.
“Ki pyndonkam drok ruh hangto bad kim salia shuh ïano-ïano ruh bad ka la long pyrshah beit, ynda la dei ka por mynstep ki wan rung pat shane”, la ong u Bah Rymbai.
U Bah Rymbai u la ïathuh ba man ka por ba ka shnong ka ju ïoh bat ïa ki nongtuh ka ju dei beit ha ki por mynstep bad haba ki tohkit ïa kitei ki nongtuh, la ju lap ba ki dei kiba im ha Motphran.
Namar kata, u la kyntu ïa ki bor ba dei khmih ba kin leh ïa kaba donkam bad ban nym ailad ïa kitei ki briew ba kin shong kin sah ha katei ka jaka bret ñiut katba kino-kino ki jingjia ba sngewsih kiba heh kim pat wan jia.
“Ngi kyntu ïa ki bor kiba bat ïa ka aiñ ba ki dei ban leh eiei bad ba kim dei ban ailad ïa ki briew ba kin shong hangtei namar mynta ym pat jia eiei hynrei kaba tieng ka long ba ïoh ka jia kaei-kaei kaba sngewsih ïa ki paidbah kiba ïaid ba ïeng mynmiet namar kitei ki briew kim salia shuh”, la ong u Bah Rymbai.
Na ka liang u General Secretary ka Wahthapbru, u Bah Khrawbok Dkhar, u la ong ba kum ka shnong ka ieh ha ki kti jong ka aiñ bad ha ki bor ba halor ba kin leh ïa kaba donkam ban rat dyngkhong ïa kum kine ki kam sniew kiba lah ban buh jingma ïa ki paidbah nongïaid-nongïeng bad ïa ki shnong ki thaw.
Na ka liang u Rangbah Shnong ka Mawkhar, u Bah Arwan Tariang u la ong ba kum u Rangbah Shnong u lap ba ka jingjyllei ka jingshah tuh hapoh ka shnong ka thaw ka dei na katei ka ktem theh ñiut kaba don hapoh Motphran.
U la ong hadien ba ka shnong ka la ïoh khubor ba ki ju don ki nongshong dih drok hajan katei ka jaka bret ñiut, ka ju leit ban jurip ha ki por mynmiet ïa katei ka jaka hynrei ka ju jia pat ba ym ju lap satia ïa kitei kiba ju leh ïa kitei ki jait kam.
“Ngi shu suba ba kito ki khynnah kiba ïashong hangto ki lah ban dei kito hi kiba hiar shane sha ki shnong ki thaw jong ngi kiba marjan ban ïa tuh ïa thiem”, la ong u Bah Tariang.
U Bah Tariang u la kyntu biang sa shisien ïa ka Municipal ba ka dei ban weng ïa katei ka jaka bret ñiut na katei ka jaka khnang ba kan nym don shuh ka jingshah tuh shah thiem bad ka jingjyllei ki kam sniew hapoh Motphran. Nalor kane u la ong ruh ba ki pulit kiba don kamram ha Motphran, ki dei ban pyndonkam ïa ka bor ba la pynkhamti ha ki bad ban beh ïa ki khynnah kiba ju ïalum lymbung ha katei ka jaka bret ñiut ban dih drok hynrei ym ban shu sngap.
Shuh shuh u Bah Arwan u la ong ba ha ki por mynshwa ki nongtuh ki ju wan ban tuh ha ki por mynmiet hynrei mynta pat ki nongtuh ki ju wan ha ki por dangstep bad ynda la kham shai ka bneng.
“Ngi na ka liang ka shnong ngi hap ban long kiba peit pyrman ïa ka shnong ka thaw bad ban kyntu ïa ki para nongshong shnong ba kin sumar bad ba kan nym don kano-kano ka jingjia hadien habud”, la ong u Bah Tariang.
Lyngba kane ka khubor ngi ngeit skhem ba ki bor ba dei khmih kin leh ïa ka kamram jong ki; kata ban weng ïa katei ka jaka bret ñiut, ban ïaid pahara ha ka por mynmiet ha ki thaiñ Motphran khnang ba kan don ka jingshngaiñ bad sha kiwei pat jaka ruh. Ha kajuh ka por u la kyntu ruh ban ai jingïarap lem ïa kito kiba la ngat bad kyrni ha u drok kiba ju sah ha katei ka jaka bret ñiut bad ki bym don ïing don sem shuh.
