Shillong, Rymphang 04
U MDC ka BJP, u Bernard N Marak, ha ka Sngi U Blei u la pyntip ba ki nongsam ïa ki tyndong lyer shet (LPG Cylinder) hapoh ka skhim Pradhan Mantri Ujjwala Yojana (PMUY) ki pan da ka pisa na ki baduk ha ki katto katne ki bynta jong ka Rilum Garo hashwa ba kin ïoh ïa kita ki tyndong lyer shet.
Ha u kyrwoh khubor, u Bernard u la kam ba kita kiba pan pisa ki shim haduh T. 1,000 bad T. 1,500 na ki briew baduk. U la ïathuh ba ha ka Sngi Saitjaiñ u la ïoh jingtip na uwei u nongshong shnong ka Rewak, South Garo Hills, ha kaba la ong ba uta u briew u la shah dawa T. 1,500 ban ïoh ei ïa ki tyndong lyer shet. Kane ka T. 1,500 u la ong ba ka dei na man la kawei pa kawei ka longïing kaba dei hok ban ïoh ei ïa kine ki tyndong.
Shuh shuh u la dawa na ki bor ba dei khmih ha man ki distrik ban bthah ïa ki nongsam ba kim dei satia ban pan pisa na ki briew. Lada don kiba pan pisa, dei ban pynshitom ïa ki da kaba tyngeh, u la ong. U la pyntip ba ka skhim PMUY ka dei na ka bynta ki longkmie ki baduk bad hapoh kane ka skhim, ki dei hok ban ïoh ei ïa ka jingpyndonkam da ka lyer shet ha ïing ha sem. Ki nongïoh ïa kane ka skhim kim donkam satia ban siew eiei, bad ym donkam ruh ban siew ïa ka pisa kaba dei ha ka dur jong ka ram na ka bynta ban pyndap hynriew sien ïa ka lyer ha ki tyndong kaba 14.2 kilo ynda ka la lut.
Ïa ka jingsiew (EMI-Easy Monthly Installment) hap ban siew ynda la pyndap lyer ha ka sien ba hynñiew, u la bynrap. U la ong ruh ba ki don ki briew kiba pyrshang ban pyndonkam bakla ïa kane ka skhim bad ban pynthohbria ïa ka kyrteng jong u Myntri Rangbahduh, u Narendra Modi.
