Shillong, Rymphang 04
Wat la ka jingsuba shah tep im jong u Bah Marshal Marweiñ ha Marten ka la ïaid la palat 36 kynta hynrei na ka liang ki bor ba dei khmih kim pat lap ksai satia ïa utei u samla rangbah wat hadien ba ka jingwad kaba khlem sangeh ka dang bteng ha katei ka jaka haduh mynta.
Ïa u Bah Marweiñ (30 snem ka rta) la suba ba u la shah tep im hadien ba ka ñiut kaba don ha katei ka jaka ka la twa kynsan ha ka Sngi Saitjaiñ.
Utei u samla rangbah (na Maw-kyrwat) uba shong ba sah ha Mawïong u dei uba ju im sngi da kaba tam ïa ki tin jot bad bilor na katei ka jaka bret ñiut hadien ba u la wan ban bud kali jong ka tnad Municipal.
“Haduh mynta, ngim pat ïoh. Ïa mynta ngi la rai ban sangeh noh shuwa. Ngin sa sdang biang ha ka por 7 baje lashai mynstep,” la ong u Executive Engineer (EE) ka Shillong Municipal Board (SMB), Bah F.B. Chyne.
U la ong ruh ba ka shem jingeh ban ïohi ha ka por mynmiet kumjuh kam long kaba shngaiñ ïa ki nongtrei ban ïaid shakhmat bad ka kam.
Haba kylli, u Bah Chyne u la ïathuh ba ki don 4 tylli ki puh shilum kiba la pyndonkam – 3 tylli kiba trei shapoh bad la kyrpad shuh sa na bynta 2 tylli na ki ‘riew shimet ban ïarap lem ha ka kam ïoh jia ba mih kano-kano ka jingthut ha ki kor treikam.
Halor ki sienjam kiba ka tnad ka la shim, u la ong ïa ki briew kiba wan tam tiar ha Marten (ki bym dei ki nongtrei ka SMB), ka tnad ka la pynrung kyrteng ïa ki bad ai ruh ïa ki ID.
Ha kajuh ka por, la pyrshang ban pyrkhing ïa ka rung ka mih jong ki ha Marten, u la ong.
Haba pynsngew ba ki ju don ki khynnah kiba lum tiar ha katei ka jaka ha ka por mynshuwa, u EE u la ong ba ka tnad ka la khang shi syndon ïa kane mynta.
“Man ka taïew ngi lum jingïalang bad kiba lum tiar ban batai sha ki kiei kiba dei bad bym dei ban leh ne shano bym dei ban ïaid, hynrei sngewsih ba ka wan jia noh kane ka jingjia hynrei ngin ïai bteng ban pyrkhing ïa ka ïaid ka ïeng jong ki sha ki jaka ba mynsaw,” la ong u Bah Chyne.
Na ka liang u Chief Executive Officer (CEO) ka SMB, u P.K. Boro uba la wan poi lang ha katei ka jaka ha ka Sngi U Blei, u la ong ba mar sien ïoh jingtip halor katei ka jingjia, mar-mar ka tnad ka la sdang ïa ka kam khnang ban lap ïa utei u samla rangbah uba la suba shah tep im ha katei ka jaka.
Haba jubab u la ong, “Janmiet ngin sa ïa pyrkhat kumno ban pynsted ïa kane ka kam. Ngi sa ïakynduh ruh ïa ki bahaïing hasem jong une u samla rangbah. Ngi ïatreilang bad ka State Disaster Response Force (SDRF) bad ki la leh ïa kaba donkam.”
Ka kynhun ka SDRF hapoh ka jingïalam u Bah B. Sahkhar, 2nd-in-Command, SDRF ka la ïashim bynta lang lem bad ki nongtrei ka SMB ha ka ban wad ïa u Bah Marweiñ.
