Jowai, Rymphang 03
Kum shi bynta ka jingrakhe ïa ka ‘International Water Conclave-2024’ ne ka jingïalap shaphang ka jingkordor jong ka um ban tyngkai bad ban pynneh pynsah ïa ka na ka bynta ka lawei, ki bor distrik ka West Jaiñtia Hills ha ka 2 tarik Rymphang ka la pynlong ïa ka jingpynkhuid ïa ki bynta ka Wah Myntdu – naduh Jingkieng Pamblah shaduh Treiongriang Demser.
Ïa kane ka jingpynkhuid la lam khmat da u Bah W.K. Kharbuli, MCS, Assistant Commissioner bad u Assistant Research Officer, Bah Ïaidbha Phawa ryngkat ka jingshim bynta lang ki tnad treikam Sorkar bapher-bapher ka distrik nalor ki dkhot ka Jaiñtia Fishing and Environment Protection Organisation bad ka Synjuk Ki Waheh Shnong, Jowai.
La wan shim bynta shongshit ruh da ki khynnah Scouts & Guides, North East Adventist Khliehtyrshi, NSS bad NCC jong ka Kiang Nangbah Govt College bad NCC Thomas Jones Synod College.
