Nongstoiñ, Rymphang 04
Ha ryngkat ki ummat kiba sngewsih kthang, ïa ka met ba sah jong ka Kong Wansaralin Wanñiang ha ryngkat i khun kynthei ba la sei na kpoh jong ka la tep donburom ha u Lum Jingtep ka Balang Presby-terian Tiehsaw Nongstoiñ ha ka Sngi U Blei.
Ha shwa ban tep ka la don ka jinglehniam ba la sakhi ruh da ki hajar ngut ki paidbah kiba la ïa tuid ban wan sngewlem bad ban pyntngen ïa ki bahaïing hasem.
Lah ban kdew ba ha ka janmiet jong ka 2 tarik Rymphang ha ka por kumba 6:30 janmiet, katei ka longkmie ka la duh noh ïa la ka jingim ha ryngkat i khun ba don ha kpoh hadien ba u tnga jong ka uba ki la ïashong khlad, u Biangkupar Nongsiej, u la wan ban pynïap dusmon da kaba pom da ka wait na ki bynta jong ka khlieh. Kane ka longkmie ka la khlad hashen.
Ha ka jingïakren bad ki bahaïing hasem la ong ba utei u kurim u dei uba la ïathoh kyntiew kurim donburom ha ka 28 tarik Nohprah, 2022 bad ka Kong Wansaralin. Hynrei u la ïashong khlad mynta la kumba hynriew bnai eiei. Katei ka longkmie, ha ka jingshisha, ka la ap khmih lynti ban kha noh ïa i khun sa tang da ki sngi. Hynrei kaba sngewsih ka la hap noh ha ka apot jong ka jingshah pynïap dusmon.
