Shillong, Rymphang 04
Ka jingïoh ‘vote’ ki seng saiñ pyrthei ha ka ilekshon MLA 2023 lehse ka long ka jingkdew ïano ki paidbah kin kham noh lada shim katkum ka jingïoh ‘vote’, bad ha ka ilekshon MP ka ban wan, ym lah ban batai shano ka tarajur kan kham noh khamtam ynda la ïanujor ïa ka jingïoh ‘vote’ ha ki MLA konstitwensi kiba hap ha kine ki ar tylli ki Parliamentary konstitwensi, Shillong bad Tura.
Mynta yn shim shwa tang ïa ki seng saiñ pyrthei ki ban sa ïakhun ha kane ka ilekshon sha Ïingdorbar Lok Sabha, kita ka NPP, UDP, Congress, BJP bad VPP.
Ka National People’s Party (NPP) kaba lamkhmat ïa ka jingsynshar, ka lamkhmat ruh ha ka jingïoh ‘vote’ ha ka ilekshon MLA 2023 da kaba ïoh 584,338 ‘vote’ na ki 57 tylli ki konstitwensi (31.42%).
Ka United Democratic Party (UDP) kaba ïakhun ha ki 46 tylli ki konstitwensi ka ïoh 300,747 ‘vote’ (16.21%) bad ka TMC kaba ïakhun ha ki 56 tylli ki konstitwensi ka ïoh 255,742 ‘vote’ (13.79%).
Ka Congress kaba ïakhun ha baroh 60 tylli ki konstitwensi ka ïoh 243,841 ‘vote’ (13.17%) bad ka BJP ruh kaba ïakhun ha baroh 60 tylli ki konstitwensi ka ïoh 173,043 ‘vote’ (9.30%).
Ka UDP ka la ïaid lang kawei bad ka HSPDP ha kane ka ilekshon bad lehse ka lah ban kham kiew ha ka jingïoh ‘vote’ lyngba ka jingdon ki 12 ngut ki MLA nalor ki MDC.
Lada phiah ïa ki ‘vote’ ba kine ki seng ki ïoh ha ki ar tylli ki Parliamentary konstitwensi, la kham lah shuh shuh ban sngewthuh katno ‘vote’ ki ïoh ha ki MLA konstitwensi kiba hap ha Shillong parliamentary konstitwensi bad katno ‘vote’ ha ki konstitwensi kiba hap ha Tura Parliamentary konstitwensi.
Ka NPP ka kham bun ka jingïoh ‘vote’ ha ki konstitwensi kiba hap ha Tura Parliamentary konstitwensi bad ha Shillong Parliamentary constituency ruh ka kiew bha ha ka jingïoh ‘vote’ wat lada khlem jop bun ngut.
Ka UDP bad kiwei pat ki seng ruh ki kham ïoh ‘vote’ ha ki konstitwensi kiba hap ha Shillong Parliamentary konstitwensi.
Kumta ka por kan sa batai ynda la poi ka ilekshon shano u paidbah u mon ban ai rai khamtam ha ka ilekshon MP ha kaba ki seng kiba don ha baroh kawei ka ri, ki ju kham ïoh jingshaniah ha ki ilekshon kiba la leit.
