Shillong, Rymphang 04
Ka Sorkar Jylla ka dang pynïaid shakhmat mynta ban tei sa ar tylli ki Technology Park nalor kawei kaba la dep tei na ka bynta ban plielad ïa ki samla ha ka liang ki kor ki bor khamtam lyngba ki kompani bapher bapher.
Ka tyllong khubor ka ïathuh ba ka Sorkar Jylla ka dang pynïaid shakhmat ban tei ïa ka Technology Park ka ba-ar ha New Shillong bad sa kawei pat yn tei ha Tura.
Ka Technology Park kaba nyngkong ka dei kawei na ki projek kaba la plie kum shibynta ban rakhe ïa ka jingdap 50 snem ka Jylla ha u snem 2022.
Na ka liang u Myntri Rangbah u Conrad K Sangma u la ong ba ka jingdon ki Technology Park kan long ka lad ïa ki samla kiba pyntbit ïalade ha ka liang ki kor ki bor khamtam ki samla ka Jylla kiba don shabar Jylla ba kin ïoh ban trei ha ki kompani bapher bapher kiba wan ban sdang ïa ka jingtreikam ha kane ka Jylla.
U Myntri Rangbah u la ong ba ka thong jong ka Sorkar ka long ban thaw bun ki lad ki lynti na ka bynta ki samla nalor ka lad ban seng kam bad aikam lem ïa kiwei khnang ban lah ruh ban pynurlong ïa ka jingthmu ban poi sha ka thong kata ka long ban pynpoi ïa ka Jylla Meghalaya sha ka thup jong ki 10 tylli ki Jylla kiba wan kham shakhmat.
La ong ba ha ka Technology Park kaba la dep tei, la don ki kompani kiba dei shaphang ki kor ki bor kiba la wan ban sdang ïa ka jingtreikam jong ki ha New Shillong.
Ka Technology Park ka dei kawei ka jaka ha kaba ki kompani kiba dei shaphang ki kor ki bor ki wan lang ha kajuh ka jaka ban treikam bad ai ka jingshakri ha ki bynta bapher bapher katkum ka jingdonkam kane ka juk stad mynta.
