Jowai, Rymphang 04
Ka seng Khooid Ya Ka Myntdu ha ka 3 tarik Rymphang ka la pynlong ïa ka Dorbar pyrkhat kam na ka bynta ka Myntdu ha Yung-walieh ka Chilliangraij Jowai, ha kaba ki riew rangbah, ki longkmie longkpa, samla shynrang bad kynthei kiba don ka jingsngewkhia ïa ka jinglong jingman ka wah Myntdu ki la wan ban ïashim bynta.
U Khroo Lamsalanki Pariat President Khooid Ya Ka Wah Myntdu u la pynsngew ïa ka jingïaid lynti ka seng ryngkat ki bor Sorkar ban ïada ïa ka wah Myndtu bad ki sawdong sawkun jong ka katkum ki kyndon jong ka NGT.
Hadien ka jingpynsngew ïa ka jingïaid lynti jong ka seng, ka la don ka jingïaphylliew jingmut da ki samla, ki longkmie longkpa bad ha kane ka jingïaphylliew jingmut la shim ïa ka rai ban nangpynkhlaiñ shuh shuh ïa ka rukom treikam jong ka seng da kaba pynlong ïa ki jingïalang pynsngewthuh ha man ki dong ki shnong ïa ka kamram kum ki trai-ri trai-muluk ba don sawdong ka Myntdu.
Yn pynkhlaiñ ïa ka rukom treikam ha kaba ïadei bad ka jingthmu ban ïada, pynbha ïa ki rud ka wah Myntdu da kaba khot ïa ka dorbar kyrpang ki Dolloi, ki Waheh Chnong, ki Secretary Shnong, ki dkhot ka Executive Dorbar bad ki riew shemphang kiba don ka jingkitkhlieh na ka bynta ban shngaiñ ka longbriew manbriew ha ki sawdong ka Myntdu bad ïa kane ka dorbar kyrpang yn khot ha ka 17 tarik Rymphang.
Shuh shuh ha kane ka dorbar la khot la wer ïa kino kino ki nongshong shnong kiba don shisha ka jingkitkhlieh na ka bynta ban shngaiñ ka Myntdu ban long kum ki dkhot bad ban ïatreilang bad ka Khooid Ya Ka Wah Myntdu (KYM).
