Lucknow, Rymphang 04
Ki pulit ka Uttar Pradesh Anti-Terrorism Squad (ATS) ki la kem ïa uwei u nong India uba trei ha ka Indian Embassy ha Moscow (Russia) halor ka jingkynnoh ba u la syntiat na ka bynta ka ISI lane ka Inter-Service Intelligence kaba dei ka tnat syntiat jong ka Pakistan.
Ïa une u briew uba la shah kem la ithuh kum u Satendra Siwal, bad u ju trei kum u Multi-Tasking Staff (MTS) ha ka tnat bar ri jong ka Sorkar India. La kem ïa u Siwal na Meerut, hynrei u dei uba shong ba sah ha ka shnong Shahmahiuddinpur kaba hap ha Hapur, Uttar Pradesh.
Ka jingshah kem jong u Siwal ka long hadien ba ki pulit ka ATS ki la ïoh khubor ba ka ISI ka pyrshang ban khroh ïa ki nongtrei ka tnat bar ri jong ka India da kaba ai ïa ki da ka pisa bad na ka liang jong kita ki nongtrei kin hap ban sam jingtip bakongsan sha ka ISI ha kaba ïadei bad ki shipai India.
Kita ki jingtip bakongsan ki long kiba shyrkhei bad kiba buh ïa ka India hapdeng ka jingma, la ong ka ATS.
La kynnoh ba u Siwal u la shim ïa ki kot ki sla ki bakongsan da kaba pyndonkam bakla ïa ka kam kaba u trei ha ka Indian Embassy ha Moscow. Namar jong ka jinglalot pisa, la kynnoh ba u Siwal u la ai ïa ki jingtip kiba ïadei bad ka tnat ïada ri, tnat bar ri, bad ki ktem jong ki shipai India sha ka ISI.
“Ka ATS ka la ïoh jingtip na ki tyllong khubor kiba bun ba ki briew kiba don jingïadei bad ka ISI ki la khroh ïa ki nongtrei jong ka tnat bar ri ka Sorkar India da kaba ai ïa ki da ka pisa khnang ba kin ïoh ïa ki jingtip bakongsan halor ki shipai India, bad kita ki jingtip ki lah ban buh jingma ïa ka India,” la ong ka ATS ha u kyrwoh khubor.
Hadien ka jingwad jingtip kaba bniah bad ka jingpeitngor, ki pulit ka ATS ki la khot hajir ïa u Siwal ha Meerut na ka bynta ban tohkit ïa u.
Shuh shuh la ong ba ha ka por ba la tohkit, u Siwal u khlem lah satia ban ai ïa ki jubab kiba biang, bad kham hadien u la phla ba u la donkti ban syntiat. U Siwal u la trei kum u India Based Security Assistant (IBSA) ha ka Indian Embassy ha Moscow naduh u snem 2021.
Na ka liang ka ATS ka la ai da ka FIR pyrshah ïa u Siwal hapoh ki kyndon kiba ïadei bad ka jingïaleh thma pyrshah ïa ka Ri bad ki kyndon jong ka Official Secrets Act.
Ka tnat bar ri ka la ong ba ka la don jingtip halor ka jingshah kem jong u Siwal bad ka la ïatreilang bad ki nongtohkit halor kane.
