Shillong, Rymphang 05
Ka Kong Elina Marweiñ kaba dei ka kmie jong u Bah Marshal Marweiñ uba la suba shah ban ha ka synrum ñiut ha Marten ka la dap da ka jingsngewsih kaba khraw hadien ka jingïoh pdiang ïa ki khubor halor katei jingjia kaba la wan lap ïa u khun jong ka.
Kum ban shu kdew hangne, u Bah Marshal Marweiñ, 30 snem ka rta, u dei uba ju im sngi ban bylla da kaba tam mar tin jot ha Marten u la jah bad suba jur ba u la shah taplup ha ka synrum ñiut ha ka step jong ka 3 tarik u ‘nai Rymphang 2024 ha Marten kaba don ha Mawïong. Wat la na ka liang ki pulit bad ka State Disaster Response Force (SDRF) ki la trei borbah naduh dang shai haduh ban kem dum ka suiñbneng ban lap ïa ka met jong utei u rangbah samla hynrei mynta ka por ka la ïaid la kumba 48 kynta tam ym pat lap satia haduh mynta.
Haba kren sha ki lad pathai khubor, ka Kong Elina Marweiñ ka la pynpaw ba ka dap da ka jingpang mynsiem namar kat haduh mynta ym pat lah ban sei ne lap ïa u Bah Marshal Marweiñ.
Ka Kong Marweiñ ka la ong ba kam suk satia ka mynsiem ban pynsah ïa u khun ha katei ka jaka kaba jaboh hynrei ka kwah ban ïoh noh ïa u. Lada u la khlad noh ha kane ka jingjia ruh, ka kwah ba kum ka ïing ka sem kan pynsum pynsleh shwa ïa u bad ban leit tep donburom ïa u.
“Nga da sngewsih shisha lada ym ïoh shuh, nga kwah hi ba ngan ïoh noh ïa la u khun”, la pynpaw ka Kong Marweiñ.
Ka Kong Marweiñ ka la ïathuh ba u Bah Marshal u ju pyndap ïa la ka ïing ka sem da kaba u wan trei wan ktah ha katei ka jaka.
Ka la ong ruh ba katei ka jingjia ïa u khun ka long kaba pynsngewsih namar u dei u briew uba shisur shidur, uba tip ïa ka kamai-kajih ban pyndap pynbiang ïa ka ïing ka sem, ka kurim lem bad ïa ki khun ki kti.
Ki ophisar ka tnad Municipal kiba kynthup ïa u Chief Executive Officer, u P.K Boro bad Executive Engineer, u Bah F.B Chyne ha ka Sngi U Blei ka 4 tarik u Rymphang 2024 ki la leit sha ka ïingsah jong u Bah Marshal Marweiñ ban sngewlem bad pyntngen ïa ka ïing ha kum kane ka por ba ka mad ïa kane ka apot. Na ka liang ka kurim u Bah Marshal kaba la ïakynduh bad mad ïa kane ka jingjia kaba sngewsih ka la sah ha ka umdum namar kat haduh mynta ym pat shym la lah satia ban lap ïa ka met jong u kurim jong ka.
Katei ka jingleit jong ki heh ophisar ha ïingsah jong u Bah Marshal Marweiñ ka long ban leit ai mynsiem ne pyntngen ïa katei ka longïing kaba la mad ïa kane ka jingjia kaba sngewsih.
Haduh ba thoh ïa kane ka khubor, ka jingwad ïa utei u samla rangbah ka dang bteng haduh mynta na ka liang ka tnad Municipal ha ryngkat ka jingïatreilang bad ka State Disaster Response Force (SDRF).
“Ngim pat lap haduh mynta bad ka jingwad kan dang bteng,” la ong u E.E. ka SMB, Bah F.B. Chyne.
