Jowai, Rymphang:
Ka shlem treikam u Deputy Commissioner, West Jaiñtia Hills District, Jowai ha ka 3 tarik Rymphang ka la pynlong ïa ka jingïakob kyntip bad dro dur tang na ka bynta ki khynnah bad samla pule hapoh ka district ha Conference Hall ka DC office.
Ha ka jingïakob kyntip ki don hynriew tylli ki kynhun na ki skul bad kolej kiba la wan ban ïashim bynta. Kine ki kynthup ïa ka Sohkha Government Higher Secondary School Sohkha, Thomas Jones Synod College Jowai, Kiang Nangbah Govt. College Jowai, bad artylli kiwei pat ki kynhun kidei na ka Bharat Scouts and Guides. Ha ka jingïakob dro dur pat ki don 28 ngut ki nongwan ïashim bynta.
Ki phang pdeng jong ka jingïakob dro dur ki long, Ka jingtyngkai ïa ka um, ka jingpyni lyngba ki jingdro halor ka jingtyngkai ïa ka um ba lah ban pynneh pynsah ïa ki tyllong um.
Ka jingïadei hapdeng ka jingim bad ka um, ban tih janai halor ka jingïadei ba kongsan hapdeng ka um bad ka jingim. Ka jingdon bynta ka um ha ka pyntha ki jingthaw, ka koit ka khiah bad ha baroh ki liang jong ka bha ka miat.
Ka jinglah ban tyngkai ha ka lawei: Ka jingïohi jngai halor ka jinglah ban tyngkai bad pynneh ïa ka um ha ka lawei lyngba ki jingpynshat jingmut ha ki jingdro dur, hapdeng ka jingbuh jingmut kyrpang ïa ki jingeh ba ki jaka ri lum ki mad ba ïadei bad ka jingduna bad kyrduh um.
Ki ar kynhun kiba la jop ha ka jingïakob kyntip ki kynthup ïa ka Sohkha Government Higher Secondary School Sohkha ba la ïashim bynta da u Gorge Donkupar Gassah bad u Nangkhraw Kitbor Khonglah.
Kaba wan ha ka kyrdan ba-ar pat ka dei ka Thomas Jones Synod College, Jowai ba la ïashim bynta da u Mutbha Lapasam bad u Quikly Pala.
Ka Kong B. Blah, kaba long ka Adittional Deputy Commissioner, West Jaiñtia Hills District, Jowai haba kren sha baroh ki nongïashim bynta ka la ong ba kine ki program jong ka jingïakob kam dei satia tang na ka bynta ka jingrakhe ïa International Water Conclave 2024, hynrei ka dei ruh shibynta ka jingpynsaphriang jingtip ha kaba ïadei bad ki mat ba tyngkhuh bad ka um.
Kumjuh ruh ka la ong ba ?a ka jingïakob dro dur dang hap ban ap ban pynbna ïa ki nongjop namar ka jingphah ?a ki jingdro sha Shillong ban peit thuh da ki nongbishar.
Ki nongjop na kine ki jingïakob kin ïohlad pat ban mihkhmat na ka district sha ka kyrdan ïakob ha baroh kawei ka jylla.
