Shillong, Rymphang:
Ka Seng Kur Hynñiewta Sengkmie kaba la long ha ka Sngi Saitjaiñ ha Multi Facilities Centre, Lawbah, East Khasi Hills District ka la ïoh ban sam khusnam sha ki 4 ngut ki samla kiba wan shakhmat ha ki eksamin bapher-bapher bad 2 ngut ki samla shynrang kiba ïoh takma ksiar ha ka ‘Meghalaya Games’ kaba dang shu long ha Tura.
Ïa kine ki khusnam la sam da ki nongkitkam kiba hakhmat jong ka Seng Kur Hynñiewta ha ka jingpynïaid u Bah Gopalstone Hynñiewta uba dei u Vice-President, ba la ai jingkren kyntu kynpham da u President ka seng kur, Bah J. Hynñiewta ha ka jingdonlong ki longkmie ki longkpa, ki samla bad ki hep barit ryngkat ka jingpynshit pynshngaiñ ïa ka jingïalang da ki jingrwai bad jingshad na ki samla ka kur Hynñiewta.
Kane ka jingsam khusnam ka long shibynta ban ai mynsiem ïa ki samla ba kin dang lah ban bteng ha ka jingpule bad ai mynsiem ïa ki hep ki barit kiba dang pule ha ki skul.
Haba ai jingkren ha kane ka jingïalang, u President ka Seng Kur, Bah J. Hynñiewta u la kyntu ïa ki para kur ba kin bud ryntih ïa ka dustur Khasi ban ai jait sha ka kmie.
U la ong ba ka jingthaw ïa kane ka seng kur ka long ban ïarap ïa ki para kur kiba duk ba suk.
U la kyntu ïa ki para kur kiba don ha ki tnad Sorkar bapher-bapher ba kin wan ïasnoh sha ka seng kur ban ai jingmut khnang ban pynkhlaiñ ïa ka kur.
