Shillong, Rymphang 05
Ha ki artylli ki jingjia, ki BSF ki la hap ban ther da u ‘stunt grenade’ bad siat kuli sha suiñ hadien ba ki runar ki la kawang maw ïa ki ha khappud.
Katkum ka khubor na ki pulit, u Platoon Commander ka 193rd Battalion, BSF ha Rajapara Border Outpost, South West Khasi Hills, u la ujor ba ha ka 24 tarik Kyllalyngkot ha ka por kumba 8:05 mynmiet, ki BSF ki la ïohi ïa ka jingïaid jong ki katto-katne ki briew hajan u Border Pillar Number 1210/S-6.
Na ka liang ki BSF ki la leit tur sha ka jaka ba ïaid kita ki briew, hynrei ki la shah kawang maw pynban. Namarkata, la ong ba uwei u shipai BSF u la hap ban ther da u ‘stunt grenade’ bad kita ki briew ruh ki la phet krad na katei ka jaka.
Kham hadien, ki BSF ki la ïoh kurup ïa 25 tylli ki synduk ba la thep da u soh ñiamtra uba la don 450 kilo ryngkat ka shini ba 250 kilo.
Ha kawei pat ka jingjia, u Company Commander, G-Company, 193rd Battalion jong ka Rajapara Border Outpost, u la ujor ba ha ka 30 tarik Kyllalyngkot ha ka por kumba 4 baje mynstep, ki BSF ki la lap ïa ka jingïaid jong ki katto katne ngut ki briew ba la suba ba ki dei ki nongkhaïi mar be-aiñ.
Kumta na ka liang ki BSF ki la pyrshang ban pynsangeh ïa kita ki briew, hynrei ki la shah kawang maw kylla, bad namarkata, uwei u shipai BSF u la hap ban siat shi kuli sha suiñ bad kane ka la pynlong ïa kita ki briew ban phet krad na katei ka jaka.
Na ka liang ki pulit ki la pyntip ruh ba ha ka 2 tarik Rymphang ha ka por kumba 11:30 mynstep, ki pulit ki la ïoh khubor bad uwei u briew ïa uba la tip kyrteng kum u Md. Azgar Ali (29 snem) uba ñiah ïa ka trok (AS-25BC-9852) u la shah kem na Ïew Sohra halor ka jingsuba ba u la pyndonkam drok. Ki pulit ki la bat noh ïa une u briew bad la rah ïa u sha Sohra CHC na ka bynta ban phah peit bniah ha ki doktor.
Sa ha kawei pat ka jingjia ha ka miet jong ka 1 tarik Rymphang, ki runar ki la shoh la dat ïa uwei u rangbah ba la 59 snem ka rta uba dei ruh u Manager ka Petrol Pump ha Mawlai Nonglum. Hadien kata, kita ki runar ki la phet krad bad ïa une u rangbah la pynkit sha Dr. H Gordon Roberts Hospital, Shillong ban ïoh jingsumar namar ka jingmynsaw.
