Shillong, Rymphang 05
Ka National People’s Youth Front (NPYF) ka la kynthoh tyngeh ïa ka seng Voice of the People Party (VPP) kaba shu ïaleh ban pynksan ïalade khuid ïalade ha kaba ïadei bad ki kam leh isynei ne ai jingïarap ïa ki paidbah.
Haba kren sha ki lad pathai khubor ha ka Lah Sngi U Blei, u President ka NPYF u Bah Kitborlang Nongrem u la ong ba ka VPP ka la dep ban kren shai lypa ba kam don jingisynei ban ïarap ïa ki paidbah hynrei ka long pat kaba ithamula pat ba ïalade ki ju pynap beit da ka ‘Brite’ ne ka borti rong jngum ha man la ki jingïalang paidbah kaba ki ju pynlong.
“Ngi ithamula shisha, ba haba ki paidbah ki leit rah bowl ne pan jingisynei, ki ong ba kane ka long kaba pynjaboh, katba ïalade pat ki pynap da ka borti Brite syndon ym tang da ka bowl,” la ong u Bah Kitborlang haba kynthoh pyrshah ïa ka jingkynnoh u nongaiktien ka VPP bad ban buh jingkylli ïa ka seng VPP, hato ka jingpynap Brite jong ki ka dei kaba khuid?.
Une u nongïalam ka NPYF u la ong, “Ka long kaba donbok ba ka VPP ka jop tang 4 ngut ki MLA, jin lada dei ba ka jop kham bun ym tip kaei ka ban jia ïa ki paidbah namar kine ki la kren shai ba kim don jingisynei kata ka dei kaba nga sngew ba u Nongaiktien ka VPP u ong. Nga buh ka jingkyrpad ïa ki paidbah ba kin husiar na kum kine ki nongïalam ki bym don ïa kata ka dohnud bad mynsiem ban sngew synei ïa ki para briew.”
Nalor nangta u Bah Kitborlang u la ong, “Imat une u nongaiktien ka VPP um pat ju leh isynei ïa ki paidbah baduk mynno-mynno ruh bad ba um sngewthuh ïa ka dor jong ka jingleh isynei ïa ki para briew.”
Ha kawei pat ka liang, u Bah Kitborlang u la kynthoh tyngeh ïa u nongaiktien ka VPP halor ka jingkynnoh ba u nongïalam ka NPYF u shah liang sha ki jaidbynriew Garo ha kaba ïadei bad ka reservation policy.
U Bah Kitborlang u la ong ba kam long satia kaba suk ban shu ïa mih sha surok bad pynshongshit ïa ki samla bad kynthoh ruh ba ym dei tang ka VPP kaba dawa pyntreikam ïa ka roster system, hynrei ka NPYF lem kiwei ki seng saiñ pyrthei bad ki seng kiba la dawa.
U Bah Kitborlang u la ong ruh ba lada balia u VPP ka mut ka biang bad lada balia kiwei khyndiat-khynsoit kam long, bad bynrap ba kum u nongïalam ka NPP un nym shu sngap bad lada dei ban ther tyngeh ruh un leh ïa kata.
