Shillong, Rymphang 05
Ka Khun Hynñiewtrep National Awakening Movement (KHNAM) ka la ong ba ka jingpynjlan ïa ka samoi treikam jong ki Autonomous District Council (ADC) da 6 bnai ka dei tang ka jingleh dorbor jong ka Sorkar Jylla.
“Kum ka seng, lada don ka nongrim kaba skhem ban pynjlan, ngim don eiei ban pyrshah, hynrei kane ka jingpynjlan jong ka Sorkar ïa ka samoi treikam jong ki ADC ka pyni shai ïa ka jingleh dorbor jong ka,” ong u Working President ka KHNAM-CEC, Bah Thomas Passah.
Haba pynshai halor katei ka bynta, u Bah Passah u la ong ba katkum ka Para 6 (A) jong ka Khyrnit ba 6 ka Riti Synshar ka Ri, u Lat ka Jylla u lah ban pynjlan ïa ka samoi treikam jong ki ADC tang lada don kano-kano ka jingjia ba kyrkieh ne lada don ïa ki daw kiba khlaiñ halor ka jingbym lah ban pynlong ïa ka ilekshon.
Halor ka jingpynbeit thymmai ïa ki shnong ha ki konstitwensi lyngba ki Delimitation Committee, u Bah Passah u la ong ba kane ka kam ka la sahteng naduh u snem 2013 bad mynta wat hadien ba la ïaid la 5 snem, ym shym la ïohi ïa kata ka jingpynrit ïa ki konstitwensi kiba heh.
“Kane ka jingleh ka Sorkar ka knieh noh ïa ka hok u paidbah ban jied thymmai ïa ki MDC sha ki ADC. Ka samoi treikam ka dei na bynta 5 snem, kaei kata ka daw halor ka jingpynjlan,” la buh jingkylli utei u nongïalam.
Ha kajuh ka por, u la ong ba ka jingtuklar ka Sorkar ïa ki kam jong ki ADC ha kawei ka liang ka pynïap noh ïa ka bor synshar da lade ïalade (Autonomy) jong ki ADC.
“U Lat u dei u khlieh jong ki ADC bad ka jingai jingmut ka Sorkar ïa u Lat, dei ka jingtuklar ïa ki kam jong ki ADC…ka dei ruh ka jingïuh roit. Lada dei pynban ba phah hi ki ADC sha u Lat, kata kam pher,” u la ong.
Haba pynsngew ba ha kaba kut ka rai ka shong ha u Lat ka Jylla, u Working President u la ong ba ka seng lashai ka sngi kan sa leit buh da ka jingthoh hakhmat jong u (Lat) bad kdew ruh ïa ki kyndon jong ka Khyrnit ba 6.
Shuh shuh u la bynrap, “Ngin kyrpad ruh ïa u Lat ba ka Sorkar kam dei ban mushlia ïa ki bor ba ïadei bad ki ADC.”
Ka Kynhun Myntri ka Sorkar Jylla ka la ai jingmynjur ban pynjlan ïa ka samoi treikam jong ki ar tylli ki Autonomous District Council – Khasi Hills Autonomous District Council (KHADC) bad Jaiñtia Hills Autonomous District Council (JHADC) da 6 bnai.
U Symbud Myntri Rangbah ka Jylla, Bah Prestone Tynsong u la ong ba ka rai ban pynjlan ïa ka samoi treikam jong kitei ki ar tylli ki ADC ka dei halor ka nongrim ba ki dang don hapdeng ka jingpynbeit ïa ki shnong ha ki konstitwensi bapher-bapher lyngba ki Delimitation Committee jong baroh ar tylli ki District Council kiba la thaw ha u snem ba la dep katkum ka jingaibor u Lat ka Jylla. Da kane ka jingmynjur ban pynjlan da 6 bnai ïa ka samoi treikam jong kine ki ar tylli ki District Council, ka ilekshon sha ka Ïingdorbar KHADC bad JHADC kan ym pat long haduh ban da shim rai biang da ka Sorkar.
