Shillong, Rymphang 05
Ka ram jong ka jylla Meghalaya ka la kiew sted ha kine ki ar snem tam lada peit na ki jingkheiñ jingdiah ba la ai da ka Sorkar Pdeng ha Lok Sabha ha ka Lah Sngi U Blei.
Haba jubab ïa ki jingkylli jong u Sanjay Patil, u Myntri Khynnah ka tnat Pla Tyngka, u Pankaj Chaudhary, u la ai ïa ka jingkheiñ jong baroh ki jylla ha kaba ïadei bad ka ram kaba ki don. Kine ki jingkheiñ ki dei kiba la shim na ka kaiphod jong ka Reserve Bank of India (RBI) ïa kaba la ai kyrteng ‘State Finances: A Study of Budgets of 2023-24’.
Katkum kane ka kaiphod, la pyni ba ha u snem 2022, ka ram jong ka jylla Meghalaya ka la kot sha ka T. 16,927.6 klur katba katkum ka jingkheiñ antad na ka Mang Tyngka 2023, ka ram jong ka jylla ka la kiew sha ka T. 18,845.1 klur.
Ha kajuh ka por, ka la paw ruh ba katkum ka jingkheiñ antad, ka ram jong ka Meghalaya kan poi shaduh ka T. 20,029.9 klur ha u snem Mang Tyngka 2024.
Nalorkata, u Myntri Khynnah ka tnat Pla Tyngka u la ïathuh ba ki sorkar jylla ki bei tyngka ruh ha ki ‘Treasury Bill’ jong ka Sorkar India bad ïa kine la kheiñ kum ki ram ba shipor lane ‘Short Term Debt’.
Haba jubab shuh shuh, u la ong ba ka tnat Pla Tyngka ka khlem phah peit bniah la ki don ne em ki jylla ki ban sa lait na ka jingsah ram ha ka sorkar ha ki sngi ban wan.
U Myntri Khynnah u la ong ruh ba ka tnat Expenditure jong ka tnat Pla Tyngka ka bud ïa ki kyndon ba la ai da ka Finance Commission ha ka por ba ka aibor ïa ki jylla ba kin shim ram katkum ka Article 293 (3) jong ka Riti Synshar.
U la ong ba baroh ki jylla ki la pyntreikam ïa ka aiñ Fiscal Responsibility and Budget Management (FRBM) Act. Ka dei ka kamram jong ki Ïingdorbar Thawaiñ ha ki jylla ban peit la ki sorkar ki bud ne em ïa kane ka aiñ.
Kane ka aiñ FRBM ka buh jingkitkhlieh ha ki sorkar jylla ba kin pynthikna ba kan don ka jingpyndonkam ha ka rukom kaba dei ïa ka pisa ka tyngka.
